ముంబై ఇండియన్స్కు సూర్య గుడ్ బై?.. సోషల్ మీడియాలో కలకలం!
- టీ20 కెప్టెన్సీ కోల్పోయి, జట్టులో చోటు కోల్పోయిన సూర్యకుమార్
- ముంబై ఇండియన్స్ను వీడనున్నట్టు ఊహాగానాలు
- ఇన్స్టాగ్రామ్లో ముంబైకి సంబంధించిన పోస్టులు, ఫొటోల తొలగింపు
- సూర్యకు అండగా నిలిచిన భారత మాజీ స్పిన్నర్ రవిచంద్రన్ అశ్విన్
- కెప్టెన్గా వరల్డ్ కప్ గెలిపించాడన్న విషయం మరువొద్దన్న అశ్విన్
2018లో కోల్కతా నైట్ రైడర్స్ నుంచి ముంబై ఇండియన్స్కు వచ్చిన సూర్యకుమార్, జట్టు విజయాల్లో కీలక పాత్ర పోషించాడు. అయితే, 2026 ఐపీఎల్ సీజన్లో ఆయన దారుణంగా విఫలమయ్యాడు. ఈ సీజన్లో 10 మ్యాచ్లలో కేవలం 20.77 సగటుతో 270 పరుగులు మాత్రమే చేశాడు. దీంతో ముంబై యాజమాన్యం ప్రత్యామ్నాయాల వైపు చూస్తున్నట్టు తెలుస్తోంది. సూర్యకుమార్ తన ఇన్స్టాగ్రామ్లో ముంబై ఇండియన్స్, హార్దిక్ పాండ్యా ఖాతాలను అనుసరించడం లేదని కూడా ఫ్యాన్స్ గుర్తించారు. ప్రస్తుతం రోహిత్ శర్మ, ఎంఎస్ ధోనీతో ఉన్న ఒక ఫొటో మాత్రమే సూర్య ఖాతాలో ఉంది.
సూర్యకుమార్కు అన్యాయం జరిగింది: అశ్విన్
ఈ పరిణామాలపై టీమిండియా మాజీ స్పిన్నర్ రవిచంద్రన్ అశ్విన్ స్పందించాడు. సూర్యకుమార్ను జట్టు నుంచి తప్పించడంపై అసంతృప్తి వ్యక్తం చేశాడు. "సూర్యకుమార్ స్థానంలో ఉండి ఆలోచిస్తే, అతని బాధను అర్థం చేసుకోవచ్చు. జట్టు నుంచి తొలగించినందుకు బాధపడే హక్కు ప్రతి ఆటగాడికీ ఉంటుంది" అని అశ్విన్ పేర్కొన్నాడు.
"గత 15-18 నెలలుగా సూర్య ఫామ్లో లేడన్న మాట వాస్తవమే కావచ్చు. కానీ, ఒక కెప్టెన్గా అతను దేశానికి టీ20 ప్రపంచకప్ అందించాడన్న విషయాన్ని సెలక్టర్లు విస్మరించారు. వరల్డ్ కప్లో బ్యాటర్గా గొప్పగా రాణించకపోయినా, కెప్టెన్గా జట్టును విజయపథంలో నడిపించాడు. జట్టులోని ఉత్తమ బ్యాటర్, బౌలర్ మాదిరిగానే, అతను కూడా ఉత్తమ కెప్టెన్గా తన పాత్ర పోషించాడు కదా?" అని అశ్విన్ ప్రశ్నించాడు. మొత్తం మీద టీమిండియాలో చోటు కోల్పోవడం, ఇప్పుడు ఫ్రాంచైజీ భవిష్యత్తుపై నీలినీడలు కమ్ముకోవడంతో సూర్యకుమార్ కెరీర్ ఒకరకమైన సందిగ్ధ దశలో పడింది.
