స్టార్లు, బడ్జెట్ అవసరం లేదు.. ఈ సినిమా చూసి నేర్చుకోండి: రామ్ గోపాల్ వర్మ

ప్రముఖ దర్శకుడు రామ్ గోపాల్ వర్మ హాలీవుడ్ హారర్ సినిమా 'అబ్సెషన్'పై ప్రశంసల వర్షం కురిపించారు. తక్కువ బడ్జెట్‌తో తెరకెక్కిన ఈ సినిమా సాధించిన అసాధారణ విజయం, సినీ పరిశ్రమలోని నమ్మకాలను మార్చేస్తుందని, ఇది ఒక 'రీసెట్ బటన్' లాంటిదని ఆయన అభిప్రాయపడ్డారు. ఈ మేరకు తన సోషల్ మీడియా ప్లాట్‌ఫామ్ ఎక్స్ లో ఆయన సుదీర్ఘ విశ్లేషణను పంచుకున్నారు.

కర్రీ బార్కర్ దర్శకత్వంలో వచ్చిన 'అబ్సెషన్' చిత్రాన్ని కేవలం 7,50,000 డాలర్ల (సుమారు రూ. 6.5 కోట్లు) బడ్జెట్‌తో నిర్మించారు. కానీ ఈ సినిమా ప్రపంచవ్యాప్తంగా బాక్సాఫీస్ వద్ద 170-179 మిలియన్ డాలర్ల (సుమారు రూ. 1,500 కోట్లు) వసూళ్లను సాధించి సంచలనం సృష్టించింది. ఈ నేపథ్యంలో వర్మ స్పందిస్తూ, "భారీ బడ్జెట్లు, పెద్ద స్టార్లు, వీఎఫ్ఎక్స్ హంగులు ఉన్న సినిమాలే థియేటర్లలో ఆడతాయనే నమ్మకాన్ని 'అబ్సెషన్' పటాపంచలు చేసింది" అని పేర్కొన్నారు.

ఈ సినిమాను పెద్ద స్టార్లు లేకుండా, భారీ సెట్టింగులు కాకుండా కేవలం ఓ ఇంట్లోని రెండు గదులు, కారు, ఒక చిన్న స్టోర్‌లో చిత్రీకరించారని వర్మ గుర్తుచేశారు. దీని అసలు నిర్మాణ వ్యయం రూ. 70 లక్షలకు మించి ఉండదని ఆయన అంచనా వేశారు. దర్శకుడి టేకింగ్, కెమెరా పనితనం, ఎడిటింగ్ శైలి, ముఖ్యంగా సౌండ్ డిజైన్ టెక్నిక్స్ అద్భుతంగా ఉన్నాయని కొనియాడారు. సినిమా ఎడిటింగ్ అస్తవ్యస్తంగా ఉన్నా ఒక ఉద్దేశంతో సాగిందని, లైటింగ్ విషయంలో డేవిడ్ ఫించర్ శైలిని గుర్తు చేసిందని విశ్లేషించారు.

ప్రముఖ మీడియా కథనాల ప్రకారం, ఈ సినిమా ఇండియాలోనూ మంచి వసూళ్లు రాబడుతోంది. తక్కువ బడ్జెట్‌తో నాణ్యమైన సినిమాలు ఎలా తీయవచ్చో చెప్పడానికి 'అబ్సెషన్' ఒక ఉదాహరణ అని, దీని మేకింగ్ విధానంపై అధ్యయనం చేయాలని వర్మ సూచించారు.