నీట్ రీ ఎగ్జామ్ పేపర్ కూడా లీక్ అయిందంటూ వార్తలు.. ఎన్టీయే ఆగ్రహం
- నీట్-యూజీ 2026 రీ-ఎగ్జామ్ పేపర్ లీక్ వార్తలను ఖండించిన ఎన్టీఏ
- సోషల్ మీడియాలో వదంతులు వ్యాప్తి చేసే వారిపై కఠిన చర్యలని హెచ్చరిక
- మే 3న జరిగిన పరీక్ష పేపర్ లీక్తో రద్దు కావడంతో జూన్ 21న రీ-ఎగ్జామ్
- అధికారిక వెబ్సైట్పై మాత్రమే ఆధారపడాలని విద్యార్థులకు సూచన
- జూన్ 14 నాటికి అడ్మిట్ కార్డులు విడుదలయ్యే అవకాశం
రీ-ఎగ్జామ్ పేపర్ను విక్రయిస్తామంటూ, ముందుగానే అందజేస్తామంటూ కొన్ని సోషల్ మీడియా ఖాతాలు, మెసేజింగ్ ప్లాట్ఫామ్లలో వైరల్ అవుతున్న సందేశాలను గుర్తించినట్లు ఎన్టీఏ తెలిపింది. విద్యార్థులను, వారి తల్లిదండ్రులను తప్పుదోవ పట్టించేందుకే ఈ దుష్ప్రచారం చేస్తున్నారని శనివారం విడుదల చేసిన ఒక ప్రకటనలో పేర్కొంది. తప్పుడు సమాచారాన్ని వ్యాప్తి చేస్తున్న ఛానెళ్లను, ఖాతాలను తక్షణమే తొలగించాలని కోరుతూ సైబర్క్రైమ్ అధికారులకు, సంబంధిత సోషల్ మీడియా సంస్థలకు ఫిర్యాదు చేసినట్లు వెల్లడించింది.
విద్యార్థులు ఎలాంటి వదంతులను నమ్మవద్దని, కేవలం అధికారిక వెబ్సైట్ (neet.nta.nic.in) ద్వారా వెలువడే సమాచారంపైనే ఆధారపడాలని ఎన్టీఏ సూచించింది. పరీక్షకు సంబంధించిన అడ్మిట్ కార్డులు జూన్ 14 నాటికి విడుదలయ్యే అవకాశం ఉందని ఈ సందర్భంగా తెలిపింది.
గత మే 3న జరిగిన నీట్-యూజీ 2026 పరీక్షలో అవకతవకలు జరగడం, ప్రశ్నాపత్రం లీక్ కావడంతో ఆ పరీక్షను రద్దు చేసిన విషయం తెలిసిందే. సుమారు 22 లక్షల మంది విద్యార్థుల ప్రయోజనాలను దృష్టిలో ఉంచుకుని, జూన్ 21న పునఃపరీక్ష నిర్వహిస్తున్నారు. ఈ పేపర్ లీక్ ఘటనపై ప్రస్తుతం సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) దర్యాప్తు జరుపుతోంది. ఈసారి రీ-ఎగ్జామ్ను అత్యంత పారదర్శకంగా, పటిష్ఠమైన భద్రతా చర్యల మధ్య నిర్వహిస్తామని ఎన్టీఏ పునరుద్ఘాటించింది.
