ఓటీటీ ఆడియన్స్ ను కట్టిపడేస్తున్న కన్నడ క్రైమ్ థ్రిల్లర్!

ఈ మధ్య కాలంలో ఇటు పురాణాలతో .. అటు సైన్స్ తో ముడిపడిన కథలకు విపరీతమైన ఆదరణ లభిస్తోంది. అలాగే క్రైమ్ థ్రిల్లర్ కథలకు కూడా మంచి డిమాండ్ ఉంది. ఈ నేపథ్యంలో ఈ మూడు అంశాలను కలుపుకుని ఒక కన్నడ సినిమా రూపొందింది. ఆ సినిమా పేరే 'హయగ్రీవ'. ధనిర్వ కథానాయకుడిగా నటించిన ఈ సినిమా, ఫిబ్రవరి 27వ తేదీన థియేటర్లకు వచ్చింది. మిక్స్డ్ టాక్ తెచ్చుకున్న ఈ సినిమా, ఈ నెల 22వ తేదీ నుంచి అమెజాన్ ప్రైమ్ లో స్ట్రీమింగ్ అవుతోంది.

ప్రస్తుతం ఈ సినిమా కన్నడలో మాత్రమే అందుబాటులో ఉంది. అయినా ఈ కంటెంట్ దూసుకు పోతుండటం విశేషం. శ్రీమహావిష్ణువు గుర్రం తలను ధరించి హయగ్రీవుడిగా మారడం వంటి సన్నివేశాలతో ఈ కథ మొదలై, ఆ తరువాత ప్రస్తుత కాలంలో కొనసాగుతుంది. ఈ రెండు కాలాలకు ఈ కథను ముడిపెట్టిన తీరు ఆసక్తికరంగా అనిపిస్తుంది. సంజనా ఆనంద్ .. సాధు కోకిల .. రంగాయన రఘు .. శరత్ లోహితస్య ఇతర ముఖ్యమైన పాత్రలను పోషించారు.

అర్జున్ హయగ్రీవ ఒక పోలీస్ ఆఫీసర్ గా పనిచేస్తుంటాడు. అదే సమయంలో నగరంలో వరుస హత్యలు జరుగుతూ వెళుతుంటాయి. హంతకుడిని వెతుకుతూ ఉండగానే, మరికొన్ని హత్యలు జరుగుతుంటాయి. హంతకుడు హత్యలు చేసే విధానంపై అధ్యయనం చేసిన అర్జున్ హయగ్రీవకి ఒక నిజం తెలుస్తుంది. అప్పుడు అతను ఏం చేస్తాడు? దాని పర్యవసాలు ఎలా ఉంటాయి? అనేది కథ. విజువల్స్ .. నేపథ్య సంగీతం ఈ సినిమాకి హైలైట్ గా నిలుస్తాయని అంటున్నారు. తెలుగు ఆడియో కూడా అందుబాటులోకి వచ్చే అవకాశం ఉంది.