ట్రంప్పై హత్యాయత్నం.. అధికారులు విడుదల చేసిన సంచలన వీడియో ఇదిగో!
- ట్రంప్పై హత్యాయత్నం కేసులో కీలక వీడియో విడుదల
- నిందితుడు కోల్ అలెన్ కాల్పులు జరుపుతున్న దృశ్యాలు
- సీక్రెట్ సర్వీస్ ఏజెంట్పై నిందితుడే కాల్పులు జరిపాడన్న అధికారులు
- దోషిగా తేలితే నిందితుడికి జీవిత ఖైదు పడే అవకాశం
- పటిష్ఠమైన భద్రతతో దాడిని నిమిషాల్లో అడ్డుకున్నామన్న సీక్రెట్ సర్వీస్
ఈ ఘటనలో ఒక సీక్రెట్ సర్వీస్ అధికారికి తూటా తగలగా, అది ఎవరి కాల్పుల వల్ల జరిగిందనే దానిపై సందేహాలు నెలకొన్నాయి. ఈ నేపథ్యంలో వాషింగ్టన్ యూఎస్ అటార్నీ జీనైన్ పిర్రో ఈ వీడియోను విడుదల చేశారు. "అధ్యక్షుడిపై హత్యాయత్నం చేసే క్రమంలో కోల్ అలెన్.. సీక్రెట్ సర్వీస్ అధికారిపై కాల్పులు జరిపినట్లు వీడియోలో స్పష్టంగా ఉంది. ఇది ఫ్రెండ్లీ ఫైర్ అనడానికి ఎలాంటి ఆధారాలు లేవు" అని ఆమె స్పష్టం చేశారు.
కాలిఫోర్నియాకు చెందిన 31 ఏళ్ల కోల్ అలెన్, ఒక పార్ట్-టైమ్ ట్యూటర్గా పనిచేస్తున్నాడు. విచారణ పూర్తయ్యే వరకు జైల్లోనే ఉండేందుకు అతడు అంగీకరించాడు. అతడిపై అధ్యక్షుడిపై హత్యాయత్నంతో పాటు ఆయుధాల చట్టం కింద కేసులు నమోదు చేశారు. నేరం రుజువైతే జీవిత ఖైదు పడే అవకాశం ఉంది. దాడికి ముందు తనను తాను 'ఫ్రెండ్లీ ఫెడరల్ అసాసిన్' అని చెప్పుకున్న అలెన్.. ట్రంప్ పరిపాలనపై తనకున్న వ్యతిరేకతను పరోక్షంగా వెల్లడించాడు.
ఈ ఘటనపై స్పందించిన సీక్రెట్ సర్వీస్ డైరెక్టర్ సీన్ కరన్ భద్రతా ఏర్పాట్లను సమర్థించారు. దాడిని కేవలం కొన్ని సెకన్లలోనే భద్రతా వలయం బయటి పరిధిలోనే అడ్డుకున్నామని తెలిపారు. దాడి జరిగిన ప్రదేశానికి, ట్రంప్ ఉన్న వేదికకు మధ్య 355 అడుగుల దూరం ఉందని, మధ్యలో అనేక సాయుధ అధికారులు, పటిష్ఠమైన భద్రత ఉందని ఆయన వివరించారు.
