కుల్దీప్ యాదవ్ పెళ్లికి తిలక్ వర్మ.. ముస్సోరీలో క్రికెటర్ల సందడి

టీమిండియా యువ సంచలనం తిలక్ వర్మ.. తన సహచర క్రీడాకారుడు కుల్దీప్ యాదవ్ వివాహ వేడుక కోసం డెహ్రాడూన్ విచ్చేశాడు. కుల్దీప్ యాదవ్ తన స్నేహితురాలు వన్షికను హిల్‌స్టేషన్ ముస్సోరీలో వివాహం చేసుకుంటున్నాడు. ఈ వేడుకలో పాల్గొనేందుకు తిలక్ వర్మ శనివారం డెహ్రాడూన్‌లోని జాలీ గ్రాంట్ విమానాశ్రయానికి చేరుకున్నాడు.

ఈ సందర్భంగా ఐఏఎన్ఎస్ వార్తా సంస్థతో తిలక్ వర్మ మాట్లాడాడు. "కుల్దీప్ పెళ్లి వేడుకను ఆస్వాదించడానికి వచ్చాం. ఇది ముగిసిన తర్వాత ఐపీఎల్ కోసం సన్నద్ధమవుతాం" అని తెలిపాడు. రాబోయే ఐపీఎల్‌లో తిలక్ వర్మ ముంబై ఇండియన్స్ తరఫున ఆడనున్నాడు. దేశం కోసం మరిన్ని ట్రోఫీలు గెలవడమే తమ లక్ష్యమని, ఎవరు ఆడినా దేశం గెలుపు కోసమే ఆడతారని స్పష్టం చేశాడు.

ముస్సోరీలోని ప్రఖ్యాత 'వెల్కమ్ హోటల్ ది సవోయ్'లో కుల్దీప్ యాదవ్ వివాహ వేడుకలు ఘనంగా జరుగుతున్నాయి. ఇప్పటికే శుక్రవారం రాత్రి సంగీత్ కార్యక్రమం జరిగింది. దీనికి సంబంధించిన ఫోటోలు, వీడియోలు సోషల్ మీడియాలో వైరల్ అయ్యాయి. మాజీ క్రికెటర్ సురేశ్ రైనా, యుజ్వేంద్ర చాహల్ షేర్ చేసిన చిత్రాలలో వధూవరులు సంప్రదాయ దుస్తులలో ఆకట్టుకున్నారు.

తిలక్ వర్మ కంటే ముందే సురేశ్ రైనా, రింకూ సింగ్, యుజ్వేంద్ర చాహల్, మహ్మద్ కైఫ్‌తో పాటు భారత ఫీల్డింగ్ కోచ్ టి. దిలీప్ వంటి ప్రముఖులు వేడుకలకు హాజరయ్యారు. విరాట్ కోహ్లీ, రోహిత్ శర్మ, జస్ప్రీత్ బుమ్రా వంటి మరికొంత మంది సీనియర్ ఆటగాళ్లు కూడా ఈ వివాహానికి హాజరయ్యే అవకాశం ఉందని సమాచారం. ఇటీవల ముగిసిన టీ20 ప్రపంచకప్‌లో తిలక్ వర్మ 207 పరుగులతో భారత్ విజయాల్లో తనవంతు పాత్ర పోషించిన విషయం తెలిసిందే.