Centurion Women: ఈ బామ్మలు సెంచరీ కొట్టారు... వాళ్ల లైఫ్ సీక్రెట్ ఇదేనట!
ఆరోగ్యంగా, ఎక్కువ కాలం జీవించడానికి శాస్త్రవేత్తలు పోషకాహారం, వ్యాయామం అవసరమని చెబుతున్నప్పటికీ, వందేళ్లు పైబడిన ముగ్గురు మహిళలు మాత్రం దీనికి భిన్నంగా స్పందించారు. ఇటీవల కంటెంట్ క్రియేటర్ యాయిర్ బ్రాచియాహు ముగ్గురు వృద్ధ మహిళలను ఇంటర్వ్యూ చేశారు. వారిలో ఇద్దరు 100, 101 సంవత్సరాల వయస్సు కలిగి ఉండగా, మరొకరు 90 సంవత్సరాల వయస్సు కలిగి ఉన్నారు. వారి అభిప్రాయం ప్రకారం, ఎక్కువ కాలం జీవించడానికి ఆహారం, వ్యాయామం కంటే ఒత్తిడి లేని జీవితమే ముఖ్యమని వారు నమ్ముతున్నారు.
అంతా రివర్స్ చేసేయండి!
వందేళ్ల వయస్సు గల ఒక మహిళ మాట్లాడుతూ.. ఎక్కువ కాలం జీవించడానికి రహస్యం ఏమిటని అడగ్గా "అంతా రివర్స్ లో చేసేయండి... డైట్ కోక్ తాగకండి, రెగ్యులర్ కోక్ తాగండి, వ్యాయామం చేయకండి, ముఖ్యంగా దేని గురించి చింతించకండి" అని అన్నారు. అంతేకాకుండా తనకు కాఫీ అంటే ఇష్టమని, ఐస్‌క్రీం ఎప్పుడూ తింటానని, మద్యం కూడా తాగుతానని చెప్పారు. మీకు ఏది ఇష్టమైతే అది చేయండి... మనసుకు ఆనందం కలిగించడమే ముఖ్యం అని వెల్లడించారు.
మంచి సామాజిక జీవితం గడపాలి!
101 సంవత్సరాల వయస్సు గల మరొక వృద్ధురాలు మాట్లాడుతూ... తాను రోజూ రెండు పుస్తకాలు చదువుతానని, జీవితాన్ని ఆనందిస్తానని, థియేటర్లకు వెళ్లేదానినని చెప్పారు. తనకు డ్యాన్స్ అంటే చాలా ఇష్టమని, మంచి సామాజిక జీవితాన్ని గడుపుతున్నానని ఆమె అన్నారు. ఆహారం గురించి అడిగినప్పుడు, ఆమె అన్నీ తింటానని చెప్పారు.
మిమ్మల్ని మీరు జాగ్రత్తగా చూసుకోవాలి
90 సంవత్సరాల వయస్సు గల మరో మహిళ మాట్లాడుతూ.. తాను ఎప్పుడూ మేకప్ లేకుండా బయటకు వెళ్లనని చెప్పారు. ఇంట్లో ఒంటరిగా ఉన్నా మేకప్ వేసుకోవడానికి ఇష్టపడతానని, అది తనకు మంచి అనుభూతిని ఇస్తుందని, మానసికంగా సంతోషాన్ని ఇస్తుందని వివరించారు.
నెటిజన్ల స్పందన
కొంతమంది నెటిజన్లు ఈ మహిళల అభిప్రాయాలతో ఏకీభవించగా, మరికొందరు మాత్రం విభేదించారు. ఒక వ్యక్తి "వారి మాటల ద్వారా నేను తెలుసుకున్నది ఏమిటంటే... 1. మిమ్మల్ని మీరు ప్రేమించుకోండి, 2. మీ జీవితాన్ని ప్రేమించండి, 3. మీ జీవితంలో ఒత్తిడికి గురికాకండి, జీవించండి, 4. మీరు మీలాగే ఉండండి" అని రాశారు. మరొకరు "ముఖ్యంగా ఆర్థిక స్వాతంత్ర్యం ముఖ్యం" అని పేర్కొన్నారు. మరొక నెటిజన్ "మీ ఇంటర్వ్యూలు నాకు చాలా నచ్చాయి! పంచుకున్నందుకు ధన్యవాదాలు" అని అన్నారు. కాగా, ఇంకో నెటిజన్ ఆ శతాధిక వృద్ధ వనితల మాటలను తప్పుబట్టారు. "వ్యాయామం చేయవద్దా??? ఇది తప్పుడు సలహా!" అని రాశారు.
