రెండవసారి కూడా మంచి రేటింగును రాబట్టిన 'గీతగోవిందం'

తెలుగు తెరపై ఈ మధ్య కాలంలో వచ్చిన ప్రేమకథా చిత్రాలలో 'గీత గోవిందం' ఒకటి. విజయ్ దేవరకొండ కథానాయకుడిగా చేసిన ఈ సినిమా, 100 కోట్ల క్లబ్ లోకి చేరిపోయింది. ఈ సినిమాతోనే విజయ్ దేవరకొండ స్టార్ హీరోల జాబితాలోకి చేరిపోయాడు. అలాంటి ఈ సినిమాను తొలిసారిగా జీ తెలుగు చానల్లో ఆ మధ్య ప్రసారం చేసినప్పుడు 20.18 టీఆర్పీని సాధించింది. ఈ స్థాయి రేటింగ్ రావడం అంత ఆషామాషీ విషయమేం కాదు.

ఇక ఏ సినిమా అయినా రెండవసారి బుల్లితెరపై ప్రసారమైనప్పుడు రేటింగ్ విషయంలో భారీ తేడా కనిపిస్తూ ఉంటుంది. కానీ 'గీతగోవిందం' విషయంలో అలా జరగలేదు. ఇటీవల జీ తెలుగువారు రెండవసారి ఈ సినిమాను ప్రసారం చేసినప్పుడు 17.16 టీఆర్పీని రాబట్టింది. తొలిసారి సాధించిన రేటింగుకి .. రెండవసారి రాబట్టిన రేటింగుకి మధ్య తేడా చాలా తక్కువగా ఉండటం విశేషం. మొత్తానికి 'గీతగోవిందం' ఇంకా తన సత్తాను చాటుతునే ఉందన్న మాట.