విజయ్ గెలుపును ముందే ఊహించిన పూజా హెగ్డే.. ఇంట్రెస్టింగ్ వీడియో ఇదిగో!

తమిళనాడు అసెంబ్లీ ఎన్నికల్లో నటుడు, టీవీకే అధినేత విజయ్ దళపతి ఘనవిజయం సాధించిన సంగతి తెలిసిందే. రాజకీయాల్లోకి వచ్చిన తొలిసారే ఎన్నికల్లో గెలిచి అందరినీ ఆశ్చర్యపరిచారు. ఈ నేపథ్యంలో, ఆయన 'జన నాయగన్' సినిమా సహనటి పూజా హెగ్డే చేసిన ఓ పోస్ట్ ఇప్పుడు సోషల్ మీడియాలో వైరల్ అవుతోంది. విజయ్ గెలుపును తాను ముందే ఊహించానని ఆమె ఆసక్తికరంగా వెల్లడించారు.

'జన నాయగన్' సినిమా షూటింగ్ సమయంలో తీసిన ఓ పాత వీడియోను పూజా తన ఇన్‌స్టాగ్రామ్‌లో పంచుకున్నారు. ఆ వీడియోలో, సెట్‌లోని వైట్‌బోర్డుపై 'ఎన్నికల్లో ఎవరు గెలుస్తారు?' అనే ప్రశ్న రాసి ఉంది. దాన్ని చూపించిన పూజా, వెంటనే విజయ్ వైపు తిరిగి కన్నుగీటారు. ఆమె సైగకు విజయ్ సిగ్గుతో ముఖం దాచుకుని అక్కడి నుంచి వెళ్లిపోయారు. 'ఇది జరుగుతుందని నేను ముందే ఊహించానా? కలలు నిజమవ్వడం అంటే ఇదేనేమో విజయ్ సర్' అంటూ ఆమె క్యాప్షన్ జోడించారు. ఈ సరదా వీడియో నెటిజన్లను ఆకట్టుకుంటోంది.

అంతకుముందు కూడా విజయ్‌కు అభినందనలు తెలుపుతూ పూజా ఇన్‌స్టా స్టోరీ పెట్టారు. కాగా, తొలి ప్రయత్నంలోనే విజయ్ పెరంబూర్, తిరుచిరాపల్లి ఈస్ట్ అనే రెండు నియోజకవర్గాల్లో గెలుపొందారు. పూజాతో పాటు రితేశ్ దేశ్‌ముఖ్, కీర్తి సురేశ్ వంటి పలువురు సినీ ప్రముఖులు సోషల్ మీడియా వేదికగా విజయ్‌కు శుభాకాంక్షలు తెలిపారు. ఇది విజయ్ కష్టానికి, నిబద్ధతకు నిదర్శనమని కీర్తి సురేశ్ ప్రశంసించారు.