జయకృష్ణ ఘట్టమనేని 'శ్రీనివాస మంగాపురం' చిత్రంలో మోహన్ బాబు... పవర్ ఫుల్ లుక్ ఇదిగో!

టాలీవుడ్ సూపర్ స్టార్ మహేశ్ బాబు అన్న రమేశ్ బాబు కుమారుడు జయకృష్ణ ఘట్టమనేని ఆరంగేట్ర చిత్రం 'శ్రీనివాస మంగాపురం'. ‘ఆర్ఎక్స్ 100’, ‘మంగళవారం’ వంటి వైవిధ్యమైన చిత్రాల దర్శకుడు అజయ్ భూపతి ఈ చిత్రాన్ని తెరకెక్కిస్తున్నారు. తాజాగా ఈ సినిమా నుంచి ఒక భారీ అప్ డేట్ బయటకు వచ్చింది. ఈ చిత్రంలో సీనియర్ నటుడు మోహన్ బాబు ఓ కీలక పాత్ర పోషిస్తున్నట్లు చిత్రబృందం శనివారం అధికారికంగా ప్రకటించింది.

ఈ సినిమాలో మోహన్ బాబు 'వెంకటప్పయ నాయుడు' అనే పవర్ ఫుల్ పాత్రలో కనిపించనున్నారు. వైజయంతీ మూవీస్ సోషల్ మీడియా వేదికగా మోహన్ బాబు ఫస్ట్ లుక్ ను పంచుకుంటూ.. "లెజెండరీ యాక్టర్ మోహన్ బాబు గారిని వెంకటప్పయ నాయుడిగా పరిచయం చేస్తున్నాం. గంభీరత్వం, పౌరుషం కలగలిసిన ఈ పాత్రలో ఆయన నటన అద్భుతంగా ఉండబోతోంది" అని పేర్కొంది. చందమామ కథలు పిక్చర్స్ బ్యానర్ పై పి.కిరణ్ ఈ చిత్రాన్ని నిర్మిస్తుండగా, ప్రముఖ నిర్మాత అశ్వనీదత్ సమర్పిస్తున్నారు.

జయకృష్ణ ఘట్టమనేని ఈ సినిమాతో వెండితెరకు పరిచయం అవుతున్నారు. గతంలో కృష్ణతో ‘అగ్నిపర్వతం’, మహేశ్ బాబుతో ‘రాజకుమారుడు’ వంటి బ్లాక్ బస్టర్లను అందించిన అశ్వనీదత్.. ఇప్పుడు మూడో తరం హీరో జయకృష్ణను లాంచ్ చేస్తుండటం విశేషం. ప్రముఖ నటి రవీనా టాండన్ కుమార్తె రాషా తడానీ ఈ చిత్రంలో హీరోయిన్ గా నటిస్తోంది. తెలుగులో ఆమెకు ఇదే తొలి చిత్రం. 

గ్రామీణ నేపథ్యంలో, వాస్తవికతకు దగ్గరగా ఉండే ఇంటెన్స్ లవ్ స్టోరీగా ఈ చిత్రం రూపొందుతోంది. జయకృష్ణ తన డెబ్యూ కోసం నటన, డ్యాన్స్, ఫైట్స్ లో ప్రత్యేక శిక్షణ తీసుకున్నారని సమాచారం. జీవీ ప్రకాష్ కుమార్ ఈ చిత్రానికి సంగీతం అందిస్తున్నారు.