పాత డిమాండ్ల సాధనకు ఇదే మంచి తరుణం అని భావిస్తున్న పాక్ క్రికెట్ బోర్డు!
- భారత్తో మ్యాచ్ను అవకాశంగా మార్చుకుంటున్న పాక్ బోర్డు
- ఐసీసీ నుంచి ఆదాయ వాటాను పెంచాలని ప్రధాన డిమాండ్
- మధ్యవర్తులతో తెరవెనుక చర్చలు జరుపుతున్న పీసీబీ
- పాక్ వైఖరి మార్చుకోవాలని శ్రీలంక క్రికెట్ బోర్డు ఒత్తిడి
టెలికాం ఆసియా స్పోర్ట్ నివేదిక ప్రకారం, ఈ వివాదాన్ని పరిష్కరించేందుకు తెరవెనుక మంతనాలు ముమ్మరంగా జరుగుతున్నాయి. సింగపూర్ క్రికెట్ అసోసియేషన్కు చెందిన ఇమ్రాన్ ఖవాజా, ఒమన్కు చెందిన పంకజ్ ఖిమ్జీ మధ్యవర్తులుగా వ్యవహరిస్తున్నారు. క్రికెట్లో అత్యధిక ఆదాయాన్ని తెచ్చిపెట్టే భారత్-పాక్ మ్యాచ్లో తాము కీలక భాగస్వామి అయినందున, ఐసీసీ నుంచి తమకు రావాల్సిన వార్షిక ఆదాయ వాటాను పెంచాలని పీసీబీ చాలా ఏళ్లుగా డిమాండ్ చేస్తోంది. ప్రస్తుతం పీసీబీకి ఐసీసీ పూల్ నుంచి ఏటా 34.5 మిలియన్ డాలర్లు అందుతున్నాయి. ఇది భారత్, ఇంగ్లండ్, ఆస్ట్రేలియా తర్వాత నాలుగో స్థానంలో ఉంది. ఈ సంక్షోభాన్ని ఉపయోగించుకుని తమ వాటాను పెంచుకోవాలని పీసీబీ గట్టిగా బేరసారాలు ఆడుతున్నట్లు సమాచారం.
ఆదాయ వాటాతో పాటు, భారత్తో ద్వైపాక్షిక సిరీస్ల పునరుద్ధరణకు ఐసీసీ మధ్యవర్తిత్వం వహించాలని కూడా పీసీబీ కోరుతోంది. అయితే, ఇది భారత ప్రభుత్వ పరిధిలోని అంశం కావడంతో బీసీసీఐ ఇందులో ఏమీ చేయలేని పరిస్థితి. అలాగే, క్రీడాస్ఫూర్తిని పాటిస్తూ భారత ఆటగాళ్లు తమ ఆటగాళ్లతో కరచాలనం చేయాలని కూడా పీసీబీ కోరుతున్నట్లు తెలుస్తోంది.
మరోవైపు, సహ-ఆతిథ్య దేశమైన శ్రీలంక క్రికెట్ బోర్డు (ఎస్ఎల్ సీ) కూడా ఈ వివాదాన్ని పరిష్కరించేందుకు తీవ్రంగా ప్రయత్నిస్తోంది. మ్యాచ్ రద్దయితే గేట్ మనీ, పెద్ద సంఖ్యలో వచ్చే భారత అభిమానుల ద్వారా లభించే విదేశీ మారక ద్రవ్యం రూపంలో తాము భారీగా నష్టపోతామని ఆందోళన చెందుతోంది. తమ డిమాండ్లకు ఐసీసీ అంగీకరిస్తే, పాకిస్థాన్ ప్రభుత్వంతో మాట్లాడి మ్యాచ్ సజావుగా జరిగేలా చూస్తామని పీసీబీ మధ్యవర్తులకు హామీ ఇచ్చినట్లు విశ్వసనీయ వర్గాలు తెలిపాయి.
