అనకాపల్లిలో 'సిరివెన్నెల' విగ్రహావిష్కరణ... హాజరైన త్రివిక్రమ్
- అనకాపల్లిలో సిరివెన్నెల సీతారామశాస్త్రి కాంస్య విగ్రహావిష్కరణ
- విగ్రహాన్ని ఆవిష్కరించిన ప్రముఖ దర్శకుడు త్రివిక్రమ్ శ్రీనివాస్
- తానా, ఏపీ ప్రభుత్వం, సిరివెన్నెల కళాపీఠం సంయుక్త ఆధ్వర్యం
- సిరివెన్నెల పేరుతో ఏటా పురస్కారం అందిస్తామని ప్రకటన
- అక్షరాలతో సిరివెన్నెల చిరంజీవిగా నిలిచారన్న త్రివిక్రమ్
ఈ సందర్భంగా కొణతాల రామకృష్ణ మాట్లాడుతూ, అనకాపల్లిలో పుట్టి పెరిగిన సీతారామశాస్త్రి తన సాహిత్య ప్రతిభతో ఈ ప్రాంతానికి జాతీయ, అంతర్జాతీయ స్థాయిలో గుర్తింపు తెచ్చారని కొనియాడారు. ఆయన బాల్యం గడిపిన గాంధీనగర్లోనే విగ్రహం ఏర్పాటు చేయడం గర్వకారణమని, ఇది ఒక దైవ సంకల్పమని అన్నారు. సిరివెన్నెల సీతారామశాస్త్రి కళాపీఠం ద్వారా ఏటా సాహిత్య రంగంలో విశిష్ట ప్రతిభ కనబరిచిన వారికి పురస్కారం అందిస్తామని ఆయన ప్రకటించారు.
అనంతరం జరిగిన 'సిరివెన్నెల సీతారామశాస్త్రి మహోత్సవ సభ'లో త్రివిక్రమ్ శ్రీనివాస్ ప్రసంగిస్తూ, సిరివెన్నెల తన అక్షరాల రూపంలో, ఆలోచనల రూపంలో ప్రజల హృదయాల్లో శాశ్వతంగా జీవించి ఉన్నారని అన్నారు. ఇలాంటి మహానుభావుల వారసత్వాన్ని భవిష్యత్ తరాలకు స్ఫూర్తిగా నిలిచేలా కాపాడుకోవాల్సిన బాధ్యత మనందరిపై ఉందని నొక్కి చెప్పారు.
మాజీ మంత్రి మండలి బుద్ధప్రసాద్ మాట్లాడుతూ, తెలుగు సినిమా సాహిత్యంలో సిరివెన్నెల స్థానం అసమానమైనదని, ఆయన పాటల్లో మానవతా విలువలు, దేశభక్తి ఉట్టిపడతాయని పేర్కొన్నారు.
తానా ప్రతినిధి తోటకూర ప్రసాద్ మాట్లాడుతూ, టెలికాం ఉద్యోగాన్ని వదిలి సినిమా రంగంలోకి ధైర్యంగా అడుగుపెట్టి, వరుసగా మూడు నంది అవార్డులు గెలుచుకోవడం ఆయన ప్రతిభకు నిదర్శనమన్నారు.
ఈ కార్యక్రమం జనసేన ఇన్ఛార్జి రాంకీ పర్యవేక్షణలో జరిగింది. అనంతరం పెంటకోట కన్వెన్షన్ హాల్లో జరిగిన సభలో త్రివిక్రమ్, సిరివెన్నెల కుటుంబ సభ్యులను ఘనంగా సత్కరించారు. అంతకుముందు వారికి శ్రీ నూకాంబిక అమ్మవారి దేవస్థానం వద్ద పూర్ణకుంభ స్వాగతం పలికి, అమ్మవారి దర్శనం, వేద ఆశీర్వచనాలు అందించి, తీర్థ ప్రసాదాలు అందజేశారు.
