వల్లభనేని వంశీని పరామర్శించిన మాజీ మంత్రులు కొడాలి నాని, పేర్ని నాని

గన్నవరం మాజీ ఎమ్మెల్యే, వైసీపీ నేత వల్లభనేని వంశీ ఇటీవలే బెయిల్‌పై జైలు నుంచి విడుదలైన సంగతి తెలిసిందే. ఈ క్రమంలో, ఆయనను శనివారం మాజీ మంత్రులు కొడాలి నాని, పేర్ని నాని ఆత్మీయంగా పరామర్శించారు. కృష్ణా జిల్లా ఉంగుటూరు మండలం తేలప్రోలు గ్రామంలోని ఓ వైసీపీ నాయకుడి నివాసంలో ఈ భేటీ జరిగింది.

ఈ సందర్భంగా వంశీ ఆరోగ్య పరిస్థితిని కొడాలి నాని, పేర్ని నాని అడిగి తెలుసుకున్నారు. అనంతరం ముగ్గురు నేతలు కొద్దిసేపు తాజా రాజకీయ పరిణామాలతో పాటు, పలు ఇతర అంశాలపై చర్చించుకున్నట్లు సమాచారం. ఈ పర్యటనలో భాగంగా, వంశీతో పాటు కేసుల్లో అరెస్టయి విడుదలైన ఆయన అనుచరులను కూడా కొడాలి నాని కలిసి పరామర్శించడం ప్రాధాన్యత సంతరించుకుంది.

ఇదిలా ఉండగా, అంతకుముందు ఈ ఉదయం కోర్టు విధించిన బెయిల్ షరతులకు అనుగుణంగా వల్లభనేని వంశీ గన్నవరం పోలీస్ స్టేషన్ లో... కొడాలి నాని గుడివాడ పోలీస్ స్టేషన్ లో హాజరై సంతకాలు చేశారు.