Pavan kalyan: 'హరిహర వీరమల్లు' సెట్స్ పైకి పవన్ .. రిలీజ్ డేట్ ఇదే!
- చాలాకాలం క్రితమే మొదలైన 'హరి హర వీరమల్లు'
- కొన్ని కారణాల వలన వాయిదాలు పడుతూ వచ్చిన ప్రాజెక్టు
- క్రిష్ దర్శకత్వంలో చాలా వరకూ పూర్తి
- ఇప్పుడు దర్శకత్వం వహిస్తున్న జ్యోతికృష్ణ
- వచ్చే మార్చి 28వ తేదీన సినిమా విడుదల
పవన్ కల్యాణ్ కథానాయకుడిగా 'హరిహర వీరమల్లు' సినిమా రూపొందుతోంది. క్రిష్ దర్శకత్వంలో చాలావరకూ చిత్రీకరణ జరుపుకున్న ఈ సినిమా, కొన్ని కారణాల వలన చాలా కాలం క్రితమే ఆగిపోయింది. మధ్యమధ్యలో చిన్న చిన్న షెడ్యూల్స్ నే ప్లాన్ చేయడం వలన, ఆశించిన స్థాయిలో ప్రాజెక్టు ముందుకు వెళ్లలేదు. అలాంటి ఈ ప్రాజెక్టులో మళ్లీ ఇప్పుడు కదలిక మొదలైంది. ఈ రోజున మొదలైన తాజా షెడ్యూల్లో పవన్ పాల్గొన్నారు. చాలా గ్యాప్ తరువాత మళ్లీ పవన్ ఈ సెట్లో అడుగుపెట్టడం అభిమానులను ఖుషీ చేసే అంశం.
ఎ.ఎం.రత్నం నిర్మిస్తున్న ఈ సినిమాకి, మొదట్లో క్రిష్ దర్శకత్వం వహించాడు. అయితే ఈ రోజు నుంచి మొదలవుతున్న షెడ్యూల్ నుంచి ఎ.ఎం.రత్నం తనయుడు జ్యోతికృష్ణ దర్శకత్వం వహించనున్నాడు. ఈ నేపథ్యంలో ఈ సినిమా రిలీజ్ డేట్ ను కూడా ఖరారు చేస్తూ, అందుకు సంబంధించిన పోస్టర్ ను రిలీజ్ చేశారు. వచ్చే ఏడాది మార్చి 28వ తేదీన ప్రపంచవ్యాప్తంగా ఈ సినిమాను విడుదల చేయనున్నారు.
చారిత్రక నేపథ్యంలో నడిచే కథ ఇది. బందిపోటు పాత్రలో పవన్ కనిపించనున్నాడు. ఆయన సరసన నాయికగా ఈ సినిమాలో నిధి అగర్వాల్ అలరించనుంది. అర్జున్ రామ్ పాల్ .. జాక్విలిన్ ఫెర్నాండెజ్ .. ఆదిత్య మీనన్ ముఖ్యమైన పాత్రలలో కనిపించనున్నారు. కీరవాణి సంగీతం ఈ సినిమాకి హైలైట్ గా నిలవనుంది. చూడాలి మరి ఈ సినిమా ఏ స్థాయిలో సంచలనం సృష్టిస్తుందో.
