'దేవర' నుంచి దసరా స్పెషల్ పోస్టర్!

ఎన్టీఆర్ అభిమానులంతా ఇప్పుడు 'దేవర' సినిమా కోసం వేయికళ్లతో వెయిట్ చేస్తున్నారు. ఈ సినిమా షూటింగ్ చకచకా జరిగిపోతోంది. రెండు భాగాలుగా ఈ సినిమా ప్రేక్షకులను పలకరించనుందని కొరటాల చెప్పిన దగ్గర నుంచి ఈ సినిమాపై అంచనాలు మరింతగా పెరిగిపోయాయి. సముద్రతీరంలో .. గ్రామీణ నేపథ్యంలో నడిచే కథ ఇది. 

ఈ సినిమాలో ఎన్టీఆర్ డిఫరెంట్ లుక్ తో కనిపించనున్నాడు. ఆయన కాస్ట్యూమ్స్ .. చేతిలోని ఆయుధం మొదటి నుంచి హైలైట్ అవుతూ వచ్చాయి. దసరా సందర్భంగా కూడా ఆయన చేతిలోని ఆయుధంపైనే ఫోకస్ చేస్తూ, అందుకు సంబంధించిన పోస్టర్ ను వదిలారు. ఈ పోస్టర్ అభిమానులలో మరింత ఉత్కంఠను కలిగించేలా ఉంది. 

'జనతా గ్యారేజ్' తరువాత కొరటాల - ఎన్టీఆర్ నుంచి వస్తున్న సినిమా కావడం, ఈ సినిమాతోనే జాన్వీ కపూర్ టాలీవుడ్ కి పరిచయమవుతూ ఉండటం .. 'ఆర్ ఆర్ ఆర్' తరువాత ఎన్టీఆర్ చేస్తున్న పాన్ ఇండియా మూవీ కావడంతో అన్ని వైపుల నుంచి ఆసక్తిని పెంచుతూ వెళుతోంది. అనిరుధ్ సంగీతాన్ని అందిస్తున్న ఈ సినిమా, వచ్చే ఏప్రిల్ 5వ తేదీన విడుదల కానుంది.