ఆదిత్య ఎల్-1 ప్రయోగం కచ్చితంగా విజయవంతమవుతుంది: అమిత్ షా

చంద్రయాన్-3 సక్సెస్ ఇచ్చిన ఉత్సాహంతో ఇస్రో సూర్యుడిపై పరిశోధనలకు ఉరకలు వేస్తోంది. రేపు (సెప్టెంబరు 2) ఉదయం 11.50 గంటలకు ఆదిత్య ఎల్-1 ప్రయోగం నిర్వహించనున్నారు. శ్రీహరికోట నుంచి పీఎస్ఎల్వీ-సీ57 రాకెట్ ద్వారా ఈ సోలార్ మిషన్ ను రోదసిలోకి పంపించనున్నారు. 

దీనిపై కేంద్ర హోంమంత్రి అమిత్ షా స్పందించారు. ఇప్పటికే మనం చంద్రుడ్ని అందుకున్నాం, ఇకపై సూర్యుడ్ని కూడా చేరుకుంటాం అని ధీమా వ్యక్తం చేశారు. ఆదిత్య ఎల్-1 ప్రయోగం కచ్చితంగా విజయవంతమవుతుందని నమ్మకం వెలిబుచ్చారు. 

75 ఏళ్లలో అనేక విజయాలు సాధించామని, అయితే అంతటితో ఆగిపోకూడదని, నిరంతర కృషి ఉండాలని అమిత్ షా పేర్కొన్నారు. దేశంలోని ప్రతి వ్యక్తికి అభివృద్ధి ఫలాలు అందడం అనేది నాయకత్వానికి సవాలు వంటిదని అభిప్రాయపడ్డారు.