బాలయ్య 'అన్ స్టాపబుల్' నుంచి రేపు టీజర్ రిలీజ్!

బాలకృష్ణ వ్యాఖ్యాతగా గతంలో 'ఆహా'లో వచ్చిన 'అన్ స్టాపబుల్' కి అనూహ్యమైన రెస్పాన్స్ వచ్చింది. మోహన్ బాబుతో చేసిన ఫస్టు ఎపిసోడ్ నుంచి మహేశ్ బాబుతో చేసిన చివరి ఎపిసోడ్ వరకూ కూడా ఈ కార్యక్రమం ఆకట్టుకుంది. నిర్మాతగా అల్లు అరవింద్ కి గల పేరుప్రతిష్ఠల కారణంగా ఆయన ఎవరిని అనుకుంటే వారిని ఈ షోకి తీసుకుని రాగలిగారు. బాలకృష్ణ అడిగే ముక్కుసూటి ప్రశ్నలే ఈ షోను అమాంతం పైకి లేపాయి. 

అలాంటి ఈ షోకి సీజన్ 2 మొదలు కానుందనే టాక్ కొన్ని రోజులుగా బలంగా వినిపిస్తోంది. ప్రశాంత్ వర్మ దర్శకత్వం వహిస్తున్న ఈ షోకి సంబంధించిన టీజర్ ను రేపు రిలీజ్ చేయనున్నారు. విజయవాడ వేదికగా టీజర్ ను వదలనున్న విషయాన్ని తెలియజేస్తూ, పోస్టర్ ను రిలీజ్ చేశారు. ఈ సారి ఈ షోను మరింత కొత్తగా డిజైన్ చేశారనే విషయం పోస్టర్ ను చూస్తుంటేనే అర్థమవుతోంది. 

మరి ఈ సారి ఎవరెవరు ఈ వేదికపై సందడి చేయనున్నారనేది ఆసక్తికరంగా మారింది. బాలయ్య సినిమాల విషయానికి వస్తే, గోపీచంద్ మలినేని దర్శకత్వంలోని సినిమా చిత్రీకరణ పరంగా చివరిదశకు చేరుకుంది. ఆ తరువాత సినిమాను ఆయన అనిల్ రావిపూడితో చేయనున్నారు. ప్రస్తుతం అందుకు సంబంధించిన సన్నాహాలు జరుగుతున్నాయి.