మహేశ్ మూవీతో తరుణ్ రీ ఎంట్రీ!

మహేశ్ బాబు హీరోగా ఆయన 28వ సినిమాకి సన్నాహాలు జరుగుతున్నాయి. వచ్చేనెల 2వ వారం నుంచి ఈ సినిమా పట్టాలెక్కనుంది. 'అరవింద సమేత' .. 'అల వైకుంఠపురములో' వంటి బ్లాక్ బస్టర్ హిట్స్ తరువాత త్రివిక్రమ్ చేస్తున్న సినిమా కావడంతో, ఒక్కసారిగా ఈ సినిమాపై అంచనాలు పెరిగిపోయాయి. ఇక ఇది ఈ ఇద్దరి కాంబినేషన్లో రూపొందుతున్న మూడో సినిమా కావడం మరో విశేషం. 

 త్రివిక్రమ్ తన సినిమాలలోని ముఖ్యమైన పాత్రలలో సీనియర్ హీరోలను .. హీరోయిన్స్ ను తీసుకుంటూ ఉంటాడు. అలా ఈ సినిమాలోని ఒక ముఖ్యమైన పాత్ర కోసం ఆయన తరుణ్ ను తీసుకున్నట్టుగా సమాచారం. బాలనటుడిగా .. హీరోగా  తెలుగులో తరుణ్ మంచి పేరు సంపాదించుకున్న సంగతి తెలిసిందే. ఆ తరువాత ఆయన వరుస పరాజయాల కారణంగా ఇండస్ట్రీకి దూరమయ్యాడు. 

అలాంటి తరుణ్ మళ్లీ ఈ సినిమాతో రీ ఎంట్రీ ఇస్తున్నట్టుగా చెబుతున్నారు. రచయితగా మంచి పేరు తెచ్చుకున్న త్రివిక్రమ్, తరుణ్ సినిమా 'నువ్వే నువ్వే'తోనే దర్శకుడిగా పరిచయమయ్యాడు. అలాంటి త్రివిక్రమ్ సినిమాతోనే తరుణ్ రీ ఎంట్రీ ఇస్తుండటం విశేషం. ఈ సినిమాలో కథానాయికగా పూజ హెగ్డే అలరించనుంది.