Gopichand: మరోసారి సెట్స్ పైకి వెళుతున్న హిట్ కాంబినేషన్!
- 30వ సినిమా దిశగా గోపీచంద్
- శ్రీవాస్ దర్శకత్వంలో మూడో సినిమా
- ఈ నెల 24వ తేదీన సెట్స్ పైకి
- త్వరలో థియేటర్లకు 'పక్కా కమర్షియల్'
గోపీచంద్ హీరోగా ఎంట్రీ ఇచ్చిన దగ్గర నుంచి గ్యాప్ రాకుండా చూసుకుంటున్నాడు. వరుస సినిమాలు చేసుకుంటూ వెళుతున్న ఆయనకి కొంతకాలంగా సరైన హిట్ పడలేదు. దాంతో ఆయన హిట్టు కోసం వెయిట్ చేస్తూనే వస్తున్నాడు. ఈ నేపథ్యంలోనే తన 30వ సినిమాను సెట్స్ పైకి తీసుకుని వెళుతున్నాడు. ఈ సినిమాకి శ్రీవాస్ దర్శకత్వం వహించనున్నాడు.
గతంలో ఈ ఇద్దరి కాంబినేషన్లో వచ్చిన 'లక్ష్యం' .. 'లౌక్యం' సినిమాలు భారీ విజయాలను అందుకున్నాయి. ఇద్దరి కాంబినేషన్లో రూపొందుతున్న మూడో సినిమా ఇది. ఈ నెల 24వ తేదీన ఈ సినిమా షూటింగు హైదరాబాదులో ప్రారంభం కానుంది. విశ్వప్రసాద్ - వివేక్ కూచిభొట్ల ఈ సినిమాకి నిర్మాతలుగా వ్యవహరించనున్నారు.
భారీ బడ్జెట్ తో నిర్మితం కానున్న ఈ సినిమాపై అంచనాలు ఉన్నాయి. కథానాయిక ఎవరు? ప్రతినాయకుడు ఎవరు? అనే విషయాలతో పాటు, ఇతర వివరాలు త్వరలో వెల్లడించనున్నారు. గోపీచంద్ తాజా చిత్రంగా 'పక్కా కమర్షియల్' ప్రేక్షకుల ముందుకు రానున్న సంగతి తెలిసిందే.
