ఒక్కరోజులో 3.71 బిలియన్ డాలర్లు పెరిగిన ముఖేశ్ అంబానీ సంపద

కరోనా పరిస్థితుల్లోనూ రిలయన్స్ వ్యాపార సామ్రాజ్యాధినేత ముఖేశ్ అంబానీ సంపద భారీగా పెరిగింది. ఈ నెల 3న ఆయన సంపద ఒక్కదుటున 3.71 బిలియన్ డాలర్ల మేర పెరిగింది. తద్వారా ఆయన నికర ఆస్తుల మొత్తం విలువ 92.6 బిలియన్ డాలర్లకు చేరింది. ప్రస్తుతం ముఖేశ్ అంబానీకి ప్రపంచ సంపన్నుల జాబితాలో 12వ స్థానం దక్కింది. ఈ మేరకు బ్లూంబెర్గ్ వెల్లడించింది.

రిలయన్స్ షేర్ల ధరలు భారీగా పెరగడంతో అంబానీ సంపద అమాంతం పెరిగినట్టు తెలుస్తోంది. స్టాక్ మార్కెట్లో రిలయన్స్ ఇదే ఒరవడి కొనసాగిస్తే త్వరలోనే అంబానీ 100 బిలియన్ డాలర్ల క్లబ్ లో చేరడం ఖాయంగా కనిపిస్తోంది.