Pawan Kalyan: భీమ్లా నాయక్ టైటిల్ సాంగ్ విడుదల.. పవర్‌స్టార్ ఫ్యాన్స్‌కు బర్త్‌డే గిఫ్ట్
- పవన్ కల్యాణ్ జన్మదినం రోజున భీమ్లానాయక్ టైటిల్ సాంగ్
- విడుదల చేసిన దర్శకుడు రాధాకృష్ణ జాగర్లమూడి
- రామజోగయ్య శాస్త్రి రాసిన పాట
పవర్ స్టార్ పవన్ కల్యాణ్‌కు ఉన్న ఫ్యాన్ ఫాలోయింగ్ అంతా ఇంతా కాదు. ఆయన పుట్టిన రోజైన సెప్టెంబరు 2న ఆ అభిమానులు హుషారెత్తిపోతారు. వీరిని మరింత హుషారెక్కించేందుకు ‘భీమ్లా నాయక్’ చిత్ర బృందం రెడీ అయిపోయింది. పవర్ స్టార్ బర్త్‌డే రోజున అభిమానులకు అదిరిపోయే గిఫ్ట్ అందించింది. ఈ సినిమా టైటిల్ సాంగ్‌ను తాజాగా విడుదల చేసింది.
ఈ పాటకు ఎస్.ఎస్. థమన్ సంగీతం అందించగా, రామజోగయ్య శాస్త్రి దీనిని రాశారు. పవన్ కల్యాణ్ పుట్టిన రోజు నాడు ఈ పాటను విడుదల చేయడం చాలా సంతోషంగా ఉందని దర్శకుడు క్రిష్ (రాధాకృష్ణ జాగర్లమూడి) ట్వీట్ చేశారు. ఆదిత్య మ్యూజిక్ ద్వారా విడుదలైన ఈ పాట వీడియోలో థమన్, శ్రీకృష్ణ, పృథ్వీ చంద్ర, రామ్ మిరియాల తదితరులు కనిపిస్తున్నారు. పవర్ స్టార్ రేంజ్ చెప్పేలా ఉన్న ఈ పాటను విన్న అభిమానులు సంతోషంతో ఎగిరి గంతులేస్తున్నారు.
మలయాళంలో సూపర్ హిట్ అయిన అయ్యప్పనుమ్ కోషియం చిత్రాన్ని తెలుగులో ‘భీమ్లా నాయక్’ పేరిట పునర్నిర్మిస్తున్న సంగతి తెలిసిందే. ఈ సినిమాలో పవన్ కల్యాణ్‌తోపాటు రానా దగ్గుబాటి, నిత్యమీనన్, ఐశ్వర్య రాజేశ్ ప్రధాన పాత్రలు పోషిస్తున్నారు. సాగర్ కె. చంద్ర దర్శకత్వంలో తెరకెక్కుతున్న ఈ చిత్రానికి దర్శకుడు త్రివిక్రమ్ శ్రీనివాస్ స్క్రీన్‌ప్లే అందిస్తుండటం విశేషం. సితార ఎంటర్‌టైన్‌మెంట్స్ పతాకంపై సూర్యదేవర నాగవంశీ దీనిని నిర్మిస్తున్నారు.
