తమన్నా, సత్యదేవ్ సినిమాలో మేఘా ఆకాశ్!

టాలెంటెడ్ యాక్టర్ గా పేరుతెచ్చుకున్న సత్యదేవ్ కథానాయకుడుగా, అందాలతార తమన్నా హీరోయిన్ గా తెలుగులో ఓ చిత్రం రూపొందుతున్న సంగతి విదితమే. నూతన దర్శకుడు నాగశేఖర్ దర్శకత్వంలో రూపొందే ఈ చిత్రానికి 'గుర్తుందా శీతాకాలం' అనే టైటిల్ని కూడా నిర్ణయించినట్టు వార్తలొచ్చాయి. అసలు ఇప్పటికే ప్రారంభం కావలసిన ఈ చిత్రం షూటింగ్ లాక్ డౌన్ కారణంగా ఏర్పడిన డేట్స్ సమస్య వల్ల కాస్త ముందుకు వెళ్లింది.

తాజా సమాచారం ప్రకారం, ఈ చిత్రంలో మరో కథానాయిక కూడా ఉందట. ఆ పాత్ర కోసం తాజాగా మేఘా ఆకాశ్ ను ఎంపిక చేసినట్టు తెలుస్తోంది. 'లై', 'చల్ మోహన రంగా' వంటి తెలుగు చిత్రాల ద్వారా మేఘా ఆకాశ్ ప్రేక్షకులకు సుపరిచితమే. ఇందులో ఆమె కీలకమైన ఓ ప్రత్యేక పాత్రలో నటిస్తుందని అంటున్నారు.

కన్నడలో వచ్చిన 'లవ్ మాక్ టైల్' హిట్ చిత్రానికి ఇది రీమేక్ గా తెరకెక్కనుంది. ఈ చిత్రం ఆగిపోయిందంటూ ఇటీవల వార్తలు వచ్చినప్పటికీ, చిత్రం యూనిట్ వాటిని ఒట్టి పుకార్లుగా కొట్టిపారేసింది. త్వరలోనే షూటింగ్ మొదలవుతుందని పేర్కొంది.