Prabhas: ప్రభాస్ సినిమా 'ఆదిపురుష్' గురించి నాకు ముందే తెలుసు: రాజమౌళి

తన తదుపరి చిత్రం 'ఆదిపురుష్'ను ప్యాన్ ఇండియో స్టార్ ప్రభాస్ ప్రకటించిన సంగతి తెలిసిందే. మొత్తం ఐదు భాషల్లో తెరకెక్కుతున్న ఈ చిత్రాన్ని సుమారు రూ. 350 కోట్ల బడ్జెట్ తో తెరకెక్కించనున్నారు. ఈ చిత్రంలో ప్రభాస్ రాముడి పాత్రను పోషిస్తున్నట్టు సమాచారం. ప్రభాస్ సరసన ఏ హీరోయిన్ నటించబోతోందనే విషయం ఇంకా అనౌన్స్ కాలేదు. మరోవైపు ఈ చిత్రంపై దర్శకదిగ్గజం రాజమౌళి స్పందించారు.

'ఆదిపురుష్' చిత్రం గురించి తనకు ముందే తెలుసని రాజమౌళి చెప్పారు. ఈ సినిమా పోస్టర్ ను కూడా తాను ముందే చూశానని... ప్రభాస్ తనకు దాన్ని చూపించాడని తెలిపారు. అయోధ్యలో రామమందిర నిర్మాణం జరుగుతున్న సమయంలోనే... ఈ చిత్రం తెరకెక్కుతుండటం అద్భుతమని చెప్పారు. ఈ సినిమా ప్రభాస్ స్థాయిని 'బాహుబలి' కంటే ఎక్కువగా పెంచుతుందని అన్నారు.