సూపర్ స్టార్ తో మరోసారి కార్తీక్ సుబ్బరాజు!

తమిళ సూపర్ స్టార్ రజనీకాంత్ తో సినిమా చేయాలనేది ప్రతి దర్శకుడికీ లక్ష్యంగా వుంటుంది. ఇంకా చెప్పాలంటే కొందరికి జీవిత ధ్యేయం కూడా! అందుకోసం ఎడతెగని ప్రయత్నాలు చేస్తుంటారు. అయితే, ఆయన ఇమేజ్ కు తగ్గా కథను తయారుచేసుకుని, ఆయనని ఒప్పించడం అంటే మాటలు కాదు. ఇప్పటికే ఎన్నోరకాల పాత్రలు చేసేసిన రజనీని కొత్త తరహా పాత్రలో చూపించడం కూడా ఆషామాషీ కాదు.

అలాంటిది ఆయనతో రెండో సినిమా చేసే అవకాశం రావడం ఎంతో అదృష్టమనే చెప్పాలి. అటువంటి అదృష్టం, అవకాశం ఇప్పుడు తమిళ దర్శకుడు కార్తీక్ సుబ్బరాజుకు వచ్చాయి. గతేడాది రజనీతో ఆయన చేసిన 'పేట' సినిమా తమిళ నాటే కాకుండా, తెలుగునాట కూడా మంచి హిట్టయింది. ఈ క్రమంలో తాజాగా కార్తీక్ మరో కథను రజనీకి వినిపించాడట. ఇది కూడా కొత్త తరహాగా ఉండడంతో రజనీ వెంటనే ఓకే చెప్పేశాడని అంటున్నారు. ప్రస్తుతం తాను శివ దర్శకత్వంలో చేస్తున్న 'అన్నాత్తే' చిత్రం తర్వాత కార్తీక్ సుబ్బరాజు చిత్రాన్ని ఆయన చేస్తారని తెలుస్తోంది. ప్రస్తుతం ప్రీ ప్రొడక్షన్ పనులు జరుగుతున్నాయి.