రజనీ హిట్ మూవీ రీమేక్ లో ధనుశ్!

తమిళనాట కొత్తదనం కలిగిన కథలకు ప్రాధాన్యతనిచ్చే కథానాయకులలో ధనుశ్ ముందువరుసలో కనిపిస్తాడు. విభిన్నమైన కథలను .. విలక్షణమైన పాత్రలను ఎంచుకుంటూ విజయాలను సొంతం చేసుకుంటున్నాడు. అలాంటి ధనుశ్ .. గతంలో రజనీ చేసిన సూపర్ హిట్ మూవీని రీమేక్ చేసే ఆలోచనలో వున్నట్టుగా కొన్ని రోజుల క్రితం వార్తలు షికారు చేశాయి. లాక్ డౌన్ కారణంగా ఇంటిపట్టునే వున్న ధనుశ్, తన ఆలోచనను ఆచరణలో పెట్టడానికి అవసరమైన కసరత్తు మొదలెట్టాడని అంటున్నారు.

1981లో రజనీ చేసిన 'నెట్రి క్కాన్' భారీ విజయాన్ని సాధించింది. రజనీ ద్విపాత్రాభినయం చేసిన ఆ సినిమాలో మేనక కథానాయికగా నటించింది. ఇప్పుడు ఆ సినిమానే ధనుశ్ రీమేక్ చేయాలనుకుంటున్నాడు. మేనక కూతురైన కీర్తి సురేశ్ ను  హీరోయిన్ గా తీసుకుంటే, ప్రాజెక్టుపై క్రేజ్ పెరుగుతుందని భావిస్తున్నాడట. లాక్ డౌన్ ముగిసేలోగా మిగతా వ్యవహారాలను చక్కబెట్టి, ఆ తరువాత సెట్స్ పైకి తీసుకెళ్లాలనే ఆలోచనలో ధనుశ్ వున్నాడని అంటున్నారు.