కరోనా నేపథ్యంలో స్వీయ నిర్బంధం విధించుకున్న బాలీవుడ్ దిగ్గజం దిలీప్ కుమార్

దేశ వ్యాప్తంగా కరోనా అనుమానిత లక్షణాలతో ఆసుపత్రులకు వస్తున్న వారి సంఖ్య అంతకంతకూ పెరుగుతోంది. ప్రస్తుతానికి ఈ మహమ్మారి విస్తరిస్తున్న వేగం తక్కువగానే ఉన్నప్పటికీ... రానున్న రోజుల్లో ఇది వేగం పుంజుకునే అవకాశాలు ఉన్నాయనే భయాందోళనలు సర్వత్ర నెలకొన్నాయి. మరోవైపు, బాలీవుడ్ నట దిగ్గజం దిలీప్ కుమార్ కరోనా భయాల నేపథ్యంలో సెల్ఫ్ క్వారంటైన్ విధించుకున్నారు. ఈ విషయాన్ని ట్విట్టర్ ద్వారా ఆయన తెలియజేశారు.

కరోనా సోకకుండా ఉండేందుకు ముందస్తు చర్యల్లో భాగంగానే స్వీయ నిర్బంధాన్ని విధించుకున్నానని ఈ సందర్భంగా దిలీప్ కుమార్ తెలిపారు. తన భార్య సైరాబాను ఎలాంటి రిస్క్ ఉండకూడదనే ముందు జాగ్రత్త చర్యగా... తనకు ఇన్ఫెక్షన్ సోకకుండా ఉండేందుకు తనను ఏకాంత గదిలో ఉంచిందని చెప్పారు. ప్రస్తుతం దిలీప్ కుమార్ వయసు 97 సంవత్సరాలు.