ఎన్టీఆర్ కుమార్తెల చేతుల మీదుగా 'కథానాయకుడు' ట్రైలర్ లాంచ్!

క్రిష్ దర్శకత్వంలో ఎన్టీఆర్ బయోపిక్ షూటింగ్ చకచకా జరిగిపోతోంది. ఎన్టీఆర్ బయోపిక్ లో మొదటిభాగమైన 'కథానాయకుడు' షూటింగును ఇప్పటికే పూర్తి చేశారు. ప్రస్తుతం 'మహానాయకుడు'కి సంబంధించిన సన్నివేశాలను చిత్రీకరిస్తున్నారు. ఎన్టీఆర్ జన్మస్థలమైన 'నిమ్మకూరు'లో ఈ నెల 21వ తేదీన ఈ సినిమా ఆడియో వేడుకను నిర్వహించాలని నిర్ణయించుకున్నారు.

అంగరంగ వైభవంగా జరగనున్న ఈ వేడుకకి ఆంధ్రప్రదేశ్ ముఖ్యమంత్రి నారా చంద్రబాబు నాయుడు ముఖ్య అతిథిగా హాజరు కానున్నారు. ఎన్టీఆర్ కుమారులు .. కోడళ్లు .. కూతుళ్లు .. అల్లుళ్లు .. మనవళ్లు .. మనవరాళ్లు ఇలా అంతా కూడా ఈ వేడుకకి హాజరు కానున్నట్టుగా తెలుస్తోంది. ఈ వేదికపై ఆ రోజున ట్రైలర్ ను రిలీజ్ చేయనున్నారు. ఎన్టీఆర్ నలుగురు కుమార్తెల చేతుల మీదుగా ఈ ట్రైలర్ ను లాంచ్ చేయించనున్నట్టు సమాచారం. ఈ వేడుకను వీక్షించేందుకు నందమూరి అభిమానులంతా ఎంతో ఆసక్తిగా ఎదురుచూస్తున్నారు. సంక్రాంతి కానుకగా 'కథానాయకుడు' ప్రేక్షకుల ముందుకు రానుంది.