సెట్ లోకి మొబైల్స్ తీసుకురావొద్దని చెప్పిన త్రివిక్రమ్

త్రివిక్రమ్ శ్రీనివాస్ దర్శకత్వంలో 'అరవింద సమేత వీర రాఘవ' సినిమా రూపొందుతోంది. ఇప్పటికే ఈ సినిమా కొంతవరకూ చిత్రీకరణను జరుపుకుంది. కొన్ని రోజులుగా ప్రధాన పాత్రల కాంబినేషన్లో కీలకమైన సన్నివేశాలను చిత్రీకరిస్తూ వస్తున్నారు. ఈ నేపథ్యంలో ఎన్టీఆర్ .. నాగబాబుల కాంబినేషన్లోని ఎమోషనల్ సీన్ కి సంబంధించిన ఒక ఫోటో లీక్ అయింది. సోషల్ మీడియాలో ఇప్పుడు ఈ ఫొటో హల్ చల్ చేస్తోంది.

ఇలా లొకేషన్ నుంచి ఒక ఫొటో లీక్ కావడాన్ని, గత అనుభవాల కారణంగా త్రివిక్రమ్ సీరియస్ గానే తీసుకున్నాడట. దీంతో, ఈ సినిమాకి సంబంధించిన వాళ్లంతా కూడా ఎవరూ సెట్ లోకి మొబైల్స్ తీసుకురావొద్దని ఆదేశించాడని చెబుతున్నారు. ఒకవేళ ఎవరైనా అత్యవసరంగా ఫోన్ చేసుకోవాలనుకుంటే, సెట్ బయటికి వెళ్లి అక్కడ మాత్రమే మాట్లాడాలని గట్టిగానే చెప్పాడని అంటున్నారు.