సంక్రాంతి బరిలోకి దిగనున్న 'యాత్ర'?

మహి.వి రాఘవ్ దర్శకత్వంలో వైఎస్ రాజశేఖర్ రెడ్డి బయోపిక్ గా 'యాత్ర' సినిమా రూపొందుతోంది. ప్రధాన పాత్రలో మలయాళ సీనియర్ స్టార్ హీరో మమ్ముట్టి నటిస్తున్నారు. ప్రధానమైన పాత్రలకి సంబంధించిన కీలకమైన సన్నివేశాలను చిత్రీకరిస్తున్నారు. మమ్ముట్టి ఏకధాటిగా డేట్లు కేటాయించడంతో, నాన్ స్టాప్ గా షూటింగ్ జరుగుతోంది.

సంక్రాంతికి ఈ సినిమాను విడుదల చేయాలనే ఆలోచనలో దర్శక నిర్మాతలు వున్నారని సమాచారం. ఆల్రెడీ 'ఎన్టీఆర్' బయోపిక్ ను సంక్రాంతికి థియేటర్స్ కి తీసుకురానున్నట్టు బాలకృష్ణ చెప్పారు. చరణ్ హీరోగా బోయపాటి తీస్తున్న సినిమాను కూడా సంక్రాంతికే విడుదల చేయాలనుకుంటున్నారు. అనిల్ రావిపూడి దర్శకత్వంలో రూపొందుతోన్న 'ఎఫ్ 2' సినిమాను కూడా సంక్రాంతికి విడుదల చేయాలనే ఉద్దేశంతో వున్నారు. సంక్రాంతికి ఎన్ని సినిమాలు వచ్చినా ఆడేస్తాయిగానీ .. థియేటర్ల విషయంలోనే అసలైన సమస్య తలెత్తే అవకాశం వుంది.