దూకుడు పెంచిన నిహారిక .. మరో సినిమాకు గ్రీన్ సిగ్నల్

బుల్లితెరపై తెలుగింటి అమ్మాయిగా మంచి క్రేజ్ తెచ్చుకున్న నిహారిక, తెలుగు తెరపై కథానాయికగా రాణించడానికి తనవంతు కృషి చేస్తోంది. 'ఒక మనసు' సినిమాతో నటన పరంగా మంచి మార్కులు కొట్టేసిన నిహారిక, ఆ తరువాత మంచి కథ కోసం వెయిట్ చేస్తూ కొంత గ్యాప్ తీసుకుంది. ఆమె కథానాయికగా నటించిన 'హ్యాపీ వెడ్డింగ్' త్వరలోనే ప్రేక్షకుల ముందుకు రానుంది. లక్ష్మణ్ కార్య దర్శకత్వం వహించిన ఈ సినిమాలో .. సుమంత్ అశ్విన్ జోడీగా ఆమె నటించింది.

ఈ సినిమా విడుదలకి ముస్తాబవుతూ ఉండగానే నిహారిక మరో ప్రాజెక్టును లైన్లో పెట్టేసింది. సుజన దర్శకత్వం వహించనున్న ఈ లేడీ ఓరియెంటెడ్ మూవీలో శ్రియతో కలిసి నిహారిక చేయనుంది. ఈ సినిమాకి సంబంధించిన సన్నాహాలు జరుగుతూ ఉండగానే తాజాగా మరో ప్రాజెక్టుకు ఓకే చెప్పేసింది. నిర్వాణ సినిమాస్ వారు తమ తొలి ప్రయత్నంగా ఈ సినిమాను నిర్మిస్తున్నారు. ప్రణీత దర్శకురాలిగా పరిచయమవుతోన్న ఈ సినిమాలో కథానాయకుడిగా రాహుల్ విజయ్ కనిపించనున్నాడు. త్వరలోనే ఈ రెండు ప్రాజెక్టులు సెట్స్ పైకి వెళ్లనున్నాయి.