తెలుగులో యంగ్ హీరోకు జోడీగా రితికా సింగ్!

తెలుగు ప్రేక్షకులకు 'గురు' సినిమాతో రితికా సింగ్ పరిచయమైంది. నటన పరంగా ఆమె మంచి మార్కులు కొట్టేసింది. అది బాక్సింగ్ నేపథ్యంలో వచ్చిన సినిమా కావడంతో, గ్లామర్ పరంగా ఈ అమ్మాయిని వెతుక్కుంటూ పెద్దగా అవకాశాలు రాలేదు. అయితే తమిళంలో లారెన్స్ తో కలిసి 'శివలింగ' చేసిన ఆమె, అక్కడ అవకాశాలను బాగానే దక్కించుకుంటోంది.

ఈ క్రమంలోనే ఈ అమ్మాయికి తెలుగు నుంచి కూడా ఒక ఛాన్స్ వెళ్లింది. రాజశేఖర్ అనే నూతన దర్శకుడు సుధీర్ బాబు కథానాయకుడిగా ఒక సినిమా చేయడానికి ఏర్పాట్లు చేసుకుంటున్నాడు. ఈ సినిమాలో కథానాయికగా ఆయన రితికా సింగ్ ను తీసుకున్నాడు. ఈ మూవీలో ఆమె పాత్రకి గల ప్రాముఖ్యత ఎక్కువేనని తెలుస్తోంది. 'శమంతకమణి' తరువాత సుధీర్ బాబు చేస్తోన్న సినిమా ఇదే. ఈ సినిమా తరువాతైనా రితికా సింగ్ ఇక్కడ వరుస సినిమాలు చేస్తుందేమో చూడాలి.