రోడ్డు ప్రమాద మృతుల కుటుంబాల వద్దకు అభిమానులను పంపించిన రామ్ చరణ్

రాజమండ్రిలో జరిగిన గేమ్ చేంజర్ ప్రీ రిలీజ్ ఈవెంట్ లో పాల్గొని తిరిగివస్తున్న సమయంలో రోడ్డు ప్రమాదం జరగడంతో ఇద్దరు అభిమానులు మృతి చెందడం తెలిసిందే. గాజులూరుపాడు ప్రాంతంలో చోటు చేసుకున్న ఈ రోడ్డు ప్రమాదంలో రామ్ చరణ్ అభిమానులు అరవపల్లి మణికంఠ (23), తొక్కాడ చరణ్ (22) మరణించారు. 

ఈ ఘటనపై రామ్ చరణ్, తీవ్ర దిగ్భ్రాంతికి గురయ్యాడు. ఈ ఘటన తర్వాత, ఆయన ఇరువురి కుటుంబాలకు రూ. 5 లక్షల సాయం ప్రకటించారు. ఆయన ఆ నగదును ఇప్పటికే ఆన్ లైన్ ద్వారా మృతుల కుటుంబాలకు బదిలీ చేశారు. తాజాగా ఆయన తన అభిమానులను మృతుల కుటుంబాల వద్దకు పంపారు. రామ్ చరణ్ అభిమానులు నేడు మణికంఠ, చరణ్ ల కుటుంబాలను కలిసి రామ్ చరణ్ సందేశాన్ని అందించారు. 

వారు మణికంఠ తల్లి అరవపల్లి భవాని, చరణ్ తండ్రి తొక్కాడ అప్పారావులను కలిసి తమ సంతాపాన్ని తెలిపారు. ఈ కష్ట సమయంలో వారికి అన్ని విధాలుగా సహాయ సహకారాలు అందిస్తామని హామీ ఇచ్చారు.