సముద్రంలో మర్డర్ మిస్టరీ... అమెజాన్ ప్రైమ్ లో మలయాళ థ్రిల్లర్!

మలయాళం మేకర్స్ థ్రిల్లర్ జోనర్ కి సంబంధించిన కథలను తెరకెక్కించడానికి ఎక్కువగా ఆసక్తిని చూపుతూ ఉంటారు. అలా కనైల్ ఫిలిమ్స్ - మార్చి సంస్థలు కలిసి నిర్మించిన సినిమానే 'ఆదితట్టు'. జిజో ఆంటోని దర్శకత్వం వహించిన ఈ సినిమా 2022 జులై 1వ తేదీన థియేటర్లకు వచ్చింది. రెండేళ్ల తరువాత ఓటీటీకి వస్తున్న సినిమా ఇది. 

సన్నీ వేన్ - షైన్ టామ్ చాకో ప్రధానమైన పాత్రలను పోషించిన ఈ సినిమాలో... అలెగ్జాండర్ ప్రశాంత్, మురుగన్ మార్టిన్, జయపాలన్, ముల్లన్ అని, జోసెఫ్ తదితరులు ముఖ్యమైన పాత్రలను పోషించారు. నెజర్ అహ్మద్ - శ్రీహరి కె నాయర్ సంగీతాన్ని అందించిన ఈ సినిమాను ఈ నెల 15వ తేదీ నుంచి స్ట్రీమింగ్ చేయనున్నట్టు అమెజాన్ ప్రైమ్ వారు ప్రకటించారు. ఫీనిక్స్ ప్రభు యాక్షన్ సన్నివేశాలు ఈ సినిమాకి హైలైట్ గా నిలవనున్నాయి. 

కథలోకి వెళితే... కొంతమంది జాలరులు ఒక బృందంగా ఏర్పడి సముద్రంలోకి వేటకి వెళతారు. కొన్ని రోజుల ప్రయాణం అనంతరం, ఆ బృందంలోని ఒకరు దారుణంగా హత్య చేయబడతారు. దాంతో ఆ బోట్ లో ఒక భయానక వాతావరణం నెలకొంటుంది. ఎవరికివారు మిగిలిన వారిని అనుమానిస్తూ ఉంటారు. అసలు ఆ హత్యను ఎవరు చేస్తారు? ఎందుకు చేస్తారు? ఆ బోట్ తీరానికి చేరేలోగా ఎంతమంది తిరిగొస్తారు? అనేది మిగతా కథ.