నాన్నగారు, ఎన్టీఆర్ గారి మధ్య విభేదాలు... నిజమే!: అక్కినేని వెంకట్

అక్కినేని కుటుంబం గురించి ప్రత్యేకంగా చెప్పాల్సిన అవసరం లేదు. అక్కినేని నాగేశ్వరావుకి ఇద్దరు కొడుకులు.. ఇద్దరూ కూడా ఇండస్ట్రీలోనే ఎదిగారు. నాగార్జున హీరోగా అందరికీ సుపరిచితమే. ఇక రెండో కొడుకు అక్కినేని వెంకట్. ఆయన నిర్మాతగా తెరవెనుక ఉండడంతో చాలామందికి తెలియదు. నాగార్జునతో ఎక్కువ సినిమాలకు అక్కినేని వెంకట్ నిర్మాతగా వ్యవహరించడం తెలిసిందే. తాజాగా అక్కినేని వెంకట్ ఇచ్చిన ఇంటర్వ్యూలో నాగేశ్వరావు గారితో ఉన్న ఆయన అనుబంధాన్ని ప్రేక్షకులతో పంచుకున్నారు.  
అన్నపూర్ణ స్టూడియో నిర్మాణం ఆలోచన గురించి చెబుతూ.. " ఆ స్టూడియో ఆలోచన అంతా మా నాన్న గారిది. ఆయన బెంగళూరు వెళ్లాలని మొదట్లో అనుకున్నారు. చెన్నైలో సినీ పరిశ్రమ ఉన్నప్పుడు అక్కడ నటించడం కొంచెం ఇబ్బంది పడ్డారు. ఆ తర్వాత సినిమా ఇండస్ట్రీ అంతా ఇక్కడకి తరలిరావడంతో ఇక్కడ ఒక స్టూడియో పెట్టాలని ఆయన అనుకున్నారు. ఆ స్టూడియో ద్వారా ఇప్పుడు చాలామందికి లైఫ్ దొరకడం అనేది నిజంగా ఆయన ఆలోచన. 

అన్నపూర్ణ స్టూడియోలో సినిమాలు తీయాలని నిర్ణయించుకున్న తర్వాత మేము ప్రొడక్షన్ కోసం చాలా చోట్ల తిరిగాము. కానీ ఎవరు కూడా మేము సినిమాలు తీస్తామంటే నమ్మలేదు. నాగేశ్వరరావు గారి కొడుకులుగా మాకు మంచి గౌరవం ఉండేది. కానీ సినిమా తీయడానికి మాత్రం ఏ డైరెక్టర్ ముందుకు రాలేదు. ఇక అప్పుడే నిర్ణయించుకున్నాను. హీరో, డైరెక్టర్ ఇలా ఎంతమంది దగ్గరకని తిరుగుతాం...? హీరోగా నాగార్జుననే పెట్టి సినిమా తీయాలని, డైరెక్ట్ గా నాగార్జున దగ్గరికే వెళ్లి అడిగాను. నాగార్జున కూడా నాకు చాలా ఇష్టం సినిమాల్లో నటించడం, కచ్చితంగా చేస్తాను అని సినిమా చేయడానికి ఒప్పుకున్నాడు. కానీ ఆ విషయాన్ని మా నాన్న గారితో చెప్పడానికి మేం చాలా భయపడ్డాము. ఆయన నాగార్జునతో సినిమా అనగానే మొదట ఏమంటారో అనుకున్నాం కానీ, చివరికి  ఆయన్ని ఒప్పించాము. మొదట్లో సినిమాలో నేను కూడా కనిపించాలని అందరూ అడిగారు. విక్రమ్ సినిమాలో ఒక క్యారెక్టర్ లో కనిపించాను. తర్వాత విలన్ గా చేయమని నన్ను ఒక డైరెక్టర్ అడిగారు. కానీ నేను అందుకు ఒప్పుకోలేదు" అని వెంకట్ వివరించారు.ఎన్టీఆర్ గారితో మీ నాన్నగారికి గొడవలు ఉండేవని అప్పట్లో అందరూ అనుకున్నారు కదా.. మీరు దాని గురించి ఏం చెబుతారు? అన్న ప్రశ్నకు వెంకట్ స్పందిస్తూ.. "అవును మీరన్నది నిజమే. మా నాన్నగారికి ఎన్టీఆర్ గారితో గొడవలు ఉండేవి. కానీ అవి అంతా మర్చిపోయి, తర్వాత వాళ్ళిద్దరూ చాలా క్లోజ్ ఫ్రెండ్స్ గా ఉన్నారు. మా ఇంటికి కూడా చాలాసార్లు ఆయన వచ్చేవారు. మా ఇంటి ఫుడ్ అంటే ఆయనకి చాలా ఇష్టం. మా నాన్నగారితో పాటు ఆయన్ని కూడా కొడుకు లాగా మా నాయనమ్మ గారు చూసుకునేవారు. మా ఇంటి పెద్ద కొడుకు వచ్చాడు అని ఎన్టీఆర్ గారిని చాలా గౌరవంగా చూసుకునేవారు. ఆయన రాజకీయ రంగంలోకి వచ్చిన తర్వాత అన్నీ మర్చిపోయి మా ఇంటికి వచ్చి మా నాన్నగారితో మీ ఇంటి భోజనం నాకు చాలా నచ్చుతుందని చెప్పడం, మేము చాలా సార్లు విన్నాం. ఇక గొడవలు అంటారా.. అవన్నీ ఇండస్ట్రీలో ఉండే గొడవలే గానీ పర్సనల్ గా వాళ్ళ మధ్య ఎటువంటి మనస్పర్ధలు లేవు. వాళ్లు మంచి ఫ్రెండ్స్ లాగా, అన్నదమ్ముల్లాగా ఉండేవారు" అని తెలిపారు.