వరుసగా రెండో ఏడాది వింబుల్డన్ టైటిల్ గెలిచిన స్పెయిన్ సంచలనం కార్లోస్ అల్కరాజ్

స్పెయిన్ యువ సంచలనం కార్లోస్ అల్కరాజ్ ప్రతిష్ఠాత్మక వింబుల్డన్ గ్రాండ్ స్లామ్ టెన్నిస్ టోర్నీలో విజేతగా అవతరించాడు. ఇవాళ ఏకపక్షంగా సాగిన పురుషుల సింగిల్స్ ఫైనల్లో 21 ఏళ్ల అల్కరాజ్ 6-2, 6-2, 7-6తో దిగ్గజ క్రీడాకారుడు నొవాక్ జకోవిచ్ ను ఓడించాడు. 

తొలి రెండు సెట్లలో అల్కరాజ్ జోరుకు ఎదురులేకుండా పోయింది. మూడో సెట్లో జకోవిచ్ నుంచి ప్రతిఘటన ఎదురు కాగా, ఆ సెట్ టైబ్రేకర్ కు మళ్లింది. టైబ్రేకర్ లో విజృంభించిన అల్కరాజ్ 7-4తో గెలిచి, జకోవిచ్ పై చిరస్మరణీయ విజయం నమోదు చేశాడు. ఈ మ్యాచ్ లో జకోవిచ్ అనేక అన్ ఫోర్స్ డ్ ఎర్రర్స్ (అనవసర తప్పిదాలు) చేసి మూల్యం చెల్లించుకున్నాడు. 

కాగా, 2023లోనూ కూడా అల్కరాజ్ వింబుల్డన్ టైటిల్ నెగ్గాడు. అప్పుడు కూడా జకోవిచ్ తోనే ఫైనల్ ఆడాడు. ఈ ఏడాది ఇప్పటికే ఫ్రెంచ్ ఓపెన్ గ్రాండ్ స్లామ్ ను ఖాతాలో వేసుకున్న స్పెయిన్ యువకిశోరం అల్కరాజ్, వింబుల్డన్ ను కూడా చేజిక్కించుకుని ఈ ఏడాది రెండో మేజర్ టైటిల్ ను చేజిక్కించుకున్నాడు.