పాకిస్థాన్‌తో మ్యాచ్‌కు ముందు రోహిత్‌కు మరో గాయం.. అయినా ఓకే

టీ20 ప్రపంచకప్‌లో భాగంగా రేపు పాకిస్థాన్‌తో మ్యాచ్‌కు ముందు భారత్‌కు ఎదురుదెబ్బ తగిలింది. శుక్రవారం ప్రాక్టీస్‌లో టీమిండియా సారథి రోహిత్‌శర్మ చేతికి గాయమైంది. అయితే, ఆ తర్వాత కూడా అతడు బ్యాటింగ్ కొనసాగించడంతో ఆటగాళ్లు, సిబ్బంది, అభిమానులు ఊపిరి పీల్చుకున్నారు. 

ఓ బౌలర్ వేసిన బంతి రోహిత్ చేతి వేళ్లకు బలంగా తాకింది. దీంతో ప్రాక్టీస్‌కు కాసేపు బ్రేక్ పడింది. వెంటనే రంగంలోకి దిగిన ఫిజియోలు వైద్యం చేశారు. ఆ తర్వాత కాసేపటికే రోహిత్ మళ్లీ యథావిధిగా బ్యాటింగ్ చేశాడు. రోహిత్ గాయపడడం ఇది రెండోసారి. ఐర్లాండ్‌తో మ్యాచ్‌లో ఆఫ్ సెంచరీ తర్వాత గాయపడడంతో రిటైర్డ్ హర్ట్‌గా వెనుదిరిగాడు. కాగా, నిన్న టీమిండియా ఆటగాళ్లు న్యూయార్క్‌లోని స్టేడియంలో నాలుగు గంటలపాటు ప్రాక్టీస్ చేశారు.