రేపు హైదరాబాదులో 'చీరకట్టుతో పరుగు పందెం'... ప్రారంభించనున్న నారా బ్రాహ్మణి

అతివల్లో ఆత్మవిశ్వాసం పెంచడం, మహిళా సాధికారత, స్త్రీలలో ఆరోగ్యం పట్ల అవగాహన కల్పించడం వంటి అంశాలను దృష్టిలో ఉంచుకుని రేపు (మార్చి 17) హైదరాబాదులో చీరకట్టుతో పరుగుపందెం నిర్వహిస్తున్నారు. ఈ శారీ రన్ ప్రారంభోత్సవానికి హైదరాబాద్ నెక్లెస్ రోడ్ లోని పీపుల్స్ ప్లాజా వేదిక కానుంది. 

ఆదివారం ఉదయం 6.30 గంటలకు ప్రారంభమయ్యే ఈ కార్యక్రమం పేరు తనీరా శారీ రన్. మహిళలు చీరకట్టుతో ఈ రన్ లో పాల్గొనాల్సి ఉంటుంది. ఈ వినూత్న పరుగును హెరిటేజ్ ఫుడ్స్ ఎగ్జిక్యూటివ్ డైరెక్టర్ నారా బ్రాహ్మణి ప్రారంభించనున్నారు. దీనికి సంబంధించి ఆమె ట్వీట్ చేశారు. 

"మీ అందరినీ తనీరా శారీ రన్ లో కలుసుకోబోతున్నందుకు ఉద్విగ్నంగా ఉంది. ఈ కార్యక్రమం అతివలను, ఆరోగ్యం పట్ల మహిళల్లో అవగాహన కలిగించే వారందరినీ ఒక్కచోటికి చేర్చుతుంది. మన సంప్రదాయ దుస్తులు ధరించి సగర్వంగా ఈ కార్యక్రమంలో పాల్గొందాం. ఇప్పటివరకు అనుసరించిన మూస ధోరణులకు స్వస్తి పలుకుదాం" అని నారా బ్రాహ్మణి పిలుపునిచ్చారు. ఈ నెల 17న నెక్లెస్ రోడ్ పీపుల్స్ ప్లాజా వద్ద మీ అందరినీ కలుస్తాను అంటూ తన ట్వీట్ లో పేర్కొన్నారు.