అందుకే అరెస్ట్ చేశాం... కవిత అరెస్ట్‌పై భర్తకు సమాచారమిచ్చిన ఈడీ

బీఆర్ఎస్ ఎమ్మెల్సీ కవితను మనీలాండరింగ్ హవాలా చట్టం కింద అరెస్ట్ చేశామని ఈడీ తెలిపింది. ఢిల్లీ మద్యం కేసులో ఈ రోజు మధ్యాహ్నం నుంచి దాదాపు ఐదు గంటల పాటు ఆమెను విచారించిన ఈడీ అధికారులు సాయంత్రం అదుపులోకి తీసుకున్నారు. ఢిల్లీ మద్యం కేసులో కవితను అరెస్ట్ చేసినట్లు ఈడీ ప్రకటించింది. ఈ రోజు సాయంత్రం 5.20 నిమిషాలకు అదుపులోకి తీసుకున్నట్లు తెలిపింది. ఈ అరెస్ట్‌కు సంబంధించి కవిత భర్త అనిల్ కుమార్ కు సమాచారం అందించినట్లు పేర్కొంది. 14 పేజీల అరెస్ట్ సమాచారాన్ని భర్తకు ఇచ్చామని వెల్లడించింది.

ఈ మేరకు అసిస్టెంట్ డైరెక్టర్ జోగేందర్ పేరుతో ఈడీ... కవిత భర్తకు సమాచారం ఇచ్చింది. బంజారాహిల్స్‌లోని కవిత నివాసంలోనే అరెస్ట్ చేసినట్లు పేర్కొంది. కాగా కవితను రాజీవ్ గాంధీ అంతర్జాతీయ విమానాశ్రయం నుంచి ఢిల్లీకి తీసుకువెళుతున్నారు. రాత్రి ఈడీ కార్యాలయంలోనే విచారించే అవకాశముంది.