'ఆర్ఆర్ఆర్' చిత్రం నాకు బాగా నచ్చింది: బ్రెజిల్ దేశాధ్యక్షుడు లులా డసిల్వా

భారత్ లో నిర్వహించిన జీ20 శిఖరాగ్ర సమావేశాలకు బ్రెజిల్ అధ్యక్షుడు లూయిస్ ఇనాసియో లులా డసిల్వా కూడా విచ్చేశారు. ఢిల్లీ వచ్చిన ఆయన ఓ కార్యక్రమంలో పాల్గొన్నారు. ఈ సందర్భంగా మాట్లాడుతూ, ఆర్ఆర్ఆర్ చిత్రం తనకు ఎంతగానో నచ్చిందని వెల్లడించారు. భారతీయ చిత్రాల్లో ఆర్ఆర్ఆర్ నచ్చినంతగా మరే చిత్రం నచ్చలేదని తెలిపారు. సినిమాను అద్భుతంగా తెరకెక్కించారంటూ చిత్ర బృందాన్ని అభినందించారు. 

మూడు గంటల నిడివి ఉన్న ఆర్ఆర్ఆర్ చిత్రంలో అద్భుతమైన సన్నివేశాలు, అందమైన నృత్యాలు ఉన్నాయని లులా డసిల్వా వివరించారు. భారత్ పై బ్రిటీష్ ఆధిపత్యాన్ని తెలియజేస్తూ లోతైన విమర్శ చేయడాన్ని ఈ సినిమాలో  అర్థవంతంగా చూపించారని కితాబిచ్చారు. 

"ఈ సినిమా నిజంగా నన్ను చాలా ఆకట్టుకుంది. అందుకే, ఈ సినిమా చూసిన తర్వాత తెలిసిన వాళ్లందరినీ ఆర్ఆర్ఆర్ చిత్రం చూశారా అని అడిగాను. సినిమా చూస్తున్నంత సేపు చక్కగా ఆస్వాదించాను. ఆర్ఆర్ఆర్ దర్శకుడికి, నటీనటులకు అభినందనలు తెలియజేస్తున్నాను" అని వెల్లడించారు.