వివేకా హత్య కేసు నిందితుడు సునీల్ యాదవ్ కు మధ్యంతర బెయిల్

మాజీ ఎంపీ వైఎస్ వివేకానందరెడ్డి హత్య కేసు నిందితుడు సునీల్ యాదవ్ కు బెయిల్ లభించింది. సునీల్ యాదవ్ తండ్రి కృష్ణయ్య కన్నుమూసిన నేపథ్యంలో, ఆయన అంత్యక్రియలకు హాజరయ్యేందుకు సునీల్ యాదవ్ తెలంగాణ హైకోర్టును అనుమతి కోరారు. ఈ మేరకు బెయిల్ పిటిషన్ దాఖలు చేశారు. 

నేడు విచారణ చేపట్టిన న్యాయస్థానం సునీల్ యాదవ్ కు మధ్యంతర బెయిల్ మంజూరు చేస్తూ ఉత్తర్వులు ఇచ్చింది. ఈ నెల 9, 10 తేదీల్లోనూ... ఈ నెల 17, 18 తేదీల్లోనూ ఎస్కార్ట్ సాయంతో పులివెందుల వెళ్లేందుకు సునీల్ యాదవ్ కు తెలంగాణ హైకోర్టు అనుమతి మంజూరు చేసింది. 

అయితే తనకు పూర్తి స్థాయి బెయిల్ ఇవ్వాలన్న సునీల్ యాదవ్ పిటిషన్ పై వాదోపవాదాలు విన్న న్యాయస్థానం తీర్పును రిజర్వ్ లో ఉంచింది.