వర్షపాతం 24 మి.మీ.. రక్తపాతం 34 మి.మీ అంటూ పవన్‌ కల్యాణ్​ ‘ఓజీ’ నుంచి క్రేజీ అప్‌డేట్

బ్రో సినిమాతో ప్రేక్షకులను అలరించిన పవర్ స్టార్ పవన్ కల్యాణ్ ఇప్పుడు కంప్లీట్ యాక్షన్ చిత్రం ‘ఓజీ’తో రానున్నారు. ర‌న్ రాజా ర‌న్, సాహో వంటి చిత్రాలతో టాలీవుడ్‌లో మంచి గుర్తింపు తెచ్చుకున్న సుజిత్‌ ఈ చిత్రానికి దర్శకత్వం వహిస్తున్నాడు. వేగంగా చిత్రీకరణ జరుపుకుంటున్న ఈ చిత్రం నుంచి తాజాగా ఆసక్తికర అప్‌డేట్ వచ్చింది. సెప్టెంబర్ 2న అగ్ని తుఫాను రాబోతోందంటూ ఈ రోజు చిత్ర బృందం ఓ పోస్టర్‌‌ను సోషల్ మీడియాలో విడుదల చేసింది. ఇందులో అర్ధరాత్రి సమయంలో విలన్లను ఊచకోత కోసి తన అనుచరులతో హీరో వెళ్తున్న ఫొటోతో కూడిన పోస్టర్ ఆకట్టుకునేలా ఉంది.

.పోస్టర్‌‌లో ఓ చోట ‘లొకేషన్ చర్చి గేట్ సౌత్ బొంబాయి. టైమ్ ఉద‌యం 2 :18, వర్షపాతం సాంద్రత 24 మి.మీ, రక్తపాతం సాంద్రత 34 మి.మీ. వాడిన ఆయుధాలు : డబుల్ బారెల్ షాట్‌గన్’ అని రాసి ఉంది. ఈ పోస్టర్‌‌ను సోషల్ మీడియాలో షేర్ చేసిన డీవీవీ ఎంటర్‌టైన్‌మెంట్స్ ‘హీట్ వేవ్‌ని ఎదుర్కొనేందుకు సిద్ధంగా ఉండండి. అగ్ని తుఫాను సెప్టెంబర్ 2న వస్తోంది. ఓజీ అభిమానులారా ధైర్యంగా ఉండండి’ అంటూ క్యాప్షన్స్ ఇచ్చింది. సెప్టెంబర్ 2న పవన్‌ పుట్టిన రోజు. ఈ సందర్భంగా ఓజీ నుంచి ఫస్ట్ గ్లింప్స్ లేదా టీజర్‌‌ను విడుదల చేసే అవకాశం కనిపిస్తోంది.