సినిమా ఫీల్డ్ లో పవన్ కల్యాణ్ చిట్టా అంతా నా దగ్గరుంది... బాగుండదని చెప్పడంలేదు: ద్వారంపూడి

జనసేన పార్టీ అధ్యక్షుడు పవన్ కల్యాణ్ తనపై తీవ్ర ఆరోపణలు చేయడం పట్ల కాకినాడ సిటీ ఎమ్మెల్యే ద్వారంపూడి చంద్రశేఖర్ రెడ్డి మండిపడ్డారు. పవన్ వ్యాఖ్యలకు అదే స్థాయిలో బదులిచ్చారు. సినిమా ఫీల్డ్ లో పవన్ కల్యాణ్ చిట్టా అంతా తనవద్ద ఉందని, బాగుండదని చెప్పడంలేదని అన్నారు. 

తాను కూడా సినిమా రంగానికి చెందినవాడ్నేనని, తాను సినీ ఎగ్జిబిటర్ నని ద్వారంపూడి వెల్లడించారు. తమకు సినిమా హాళ్లు ఉన్నాయని, చిరంజీవి, పవన్ కల్యాణ్ ల సినిమాలు ఎక్కువగా తమ థియేటర్ కాంప్లెక్స్ లలోనే ఆడాయని వివరించారు. ఈ విషయం పవన్ కల్యాణ్ కు తెలియకపోవచ్చు... అల్లు అరవింద్ కు బాగా తెలుసు అని ద్వారంపూడి పేర్కొన్నారు. 

కాకినాడలోని దేవి-శ్రీదేవి, చాణక్య- చంద్రగుప్త థియేటర్లలో పవన్ కల్యాణ్ సినిమాలు ఆడించామని తెలిపారు. "నా గురించి అతనికి తెలియకపోవచ్చు కానీ... అతని గురించి నాకు బాగా తెలుసు. సినిమా ఫీల్డ్ లో నాకు కూడా చాలామంది ఉన్నారు. అతని చిట్టా త్వరలోనే నేను విప్పుతా" అని పేర్కొన్నారు.