‘మహానాడు మెతుకు’ ముట్టని పోలీసులు.. సొంతంగా భోజనాల ఏర్పాటు!

టీడీపీ మహానాడు బందోబస్తుకు హాజరైన పోలీసులు తమ భోజన ఏర్పాట్లు తామే స్వయంగా చేసుకున్నారు. మహానాడులో సిద్ధం చేసిన ఆహారం వైపు కన్నెత్తి కూడా చూడలేదు. కనీసం మజ్జిగ, మంచినీళ్లయినా తాగండని కొందరు కార్యకర్తలు సూచించినా వారు సున్నితంగా తిరస్కరించారు. గతంలో యువగళం పాదయాత్ర సందర్భంగా వచ్చిన విమర్శలను దృష్టిలో పెట్టుకునే పోలీసులు తమ భోజన ఏర్పాట్లు తామే చేసుకున్నారు. రాజమండ్రిలో రెండు రోజుల పాటు నిర్వహించిన మహానాడుకు సుమారు 1500 మంది పోలీసులు భద్రత కల్పించారు. 
 
ఇక బందోబస్తు విధుల్లో ఉన్న పోలీసుల భోజనాల కోసం ఆ శాఖ ఉన్నతాధికారులు ప్రత్యేక ఏర్పాట్లు చేశారు. ఉదయం టిఫిన్, మధ్యాహ్నం భోజనం, సాయంత్రం భోజనాలను సమకూర్చారు. భీమవరం నుంచి వంట మేస్త్రీలను రప్పించి శాకాహార, మాంసాహార వంటకాలను సిద్ధం చేయించారు. వాటిని ప్యాకెట్లలో నింపి వాహనాల్లో మహానాడుకు తరలించారు. మజ్జిగ ప్యాకెట్లను కూడా రెడీ చేశారు.