'2018' మూవీ ఓటీటీలో రానుందనే టాక్ పై స్పందించిన బన్నీ వాసు!

ఈ మధ్య కాలంలో మలయాళంలో విడుదల రోజునే హిట్ టాక్ తెచ్చుకున్న సినిమాల జాబితాలో, '2018' కూడా చేరిపోయింది. కావ్య ఫిల్మ్ కంపెనీవారు నిర్మించిన ఈ సినిమాకి, ఆంటోని జోసెఫ్ దర్శకత్వం వహించాడు. '2018'లో కేరళలో వచ్చిన వరదల నేపథ్యంలో ఈ కథ నడుస్తుంది.

ఈ నెల 5వ తేదీన విడుదలైన ఈ సినిమా, విడుదల రోజునే సక్సెస్ టాక్ తెచ్చుకుంది. ఆ తరువాత కూడా ఈ సినిమా అదే ఊపుతో వసూళ్లను రాబడుతూ దూసుకుపోతోంది. టోవినో థామస్ .. కుంచకో బోబన్ .. కల్యాణ్ అరసన్ .. అపర్ణ బాలమురళి .. తన్వీ రామ్ ప్రధానమైన పాత్రలను పోషించారు. 

ఈ సినిమా తెలుగు వెర్షన్ ఈ నెల 26వ తేదీన విడుదల కానుంది. ఈ నేపథ్యంలో కొంతసేపటి క్రితం హైదరాబాదులో ప్రెస్ మీట్ జరిగింది. గీతా ఆర్ట్స్ 2 వారు ఈ సినిమాను తెలుగులో రిలీజ్ చేస్తున్నారు. ఈ సినిమా వచ్చేవారం ఓటీటీలో రానుందనే ప్రచారం జరుగుతోందనీ, అలాంటిదేమీ లేదని బన్నీవాసు తేల్చి చెప్పాడు.