ఇస్లామాబాద్ హైకోర్టులో ఇమ్రాన్ ఖాన్.. బయట కాల్పులు

పాకిస్థాన్ మాజీ ప్రధాని ఇమ్రాన్ ఖాన్ ఇస్లామాబాద్ హైకోర్టులో ఉండగా బయట కాల్పులు జరిగాయి. కాల్పులు వాస్తవమే కానీ, ఈ ఘటనలో ఎవరూ గాయపడలేదని ఇస్లామాబాద్ పోలీసులు తెలిపారు. జి-11, జి-13 సెక్టార్‌లో పోలీసులుపై కాల్పులు జరిగినట్టు పేర్కొన్నారు. పలు కేసుల విచారణ నిమిత్తం కోర్టుకు హాజరైన ఇమ్రాన్ ఖాన్ తిరిగి వెళ్లేందుకు సిద్ధమవుతున్న సమయంలో కాల్పులు జరిగినట్టు ‘డాన్.కామ్’ పేర్కొంది.

కాల్పులతో అప్రమత్తమైన పోలీసులు కోర్టు వద్ద భద్రతను పెంచారు. ఆ తర్వాత పరిస్థితి సాధారణ స్థితికి చేరుకుంది. వివిధ కేసుల్లో ఆరోపణలు ఎదుర్కొంటున్న పీటీఐ చీఫ్ ఇమ్రాన్‌ను ఈ నెల 15 వరకు అరెస్ట్ చేయవద్దన్న హైకోర్టు ఆదేశాల తర్వాత కాల్పులు జరగడం గమనార్హం. లాహోర్‌లో నమోదైన మూడు ఉగ్రవాదం కేసులు, జిల్లే షా హత్య కేసుల్లో అరెస్ట్ నుంచి ఇమ్రాన్‌కు రక్షణ కల్పిస్తూ కోర్టు బెయిలు మంజూరు చేసింది.