అమెరికాలోని 30 నగరాలతో ఒప్పందం చేసుకున్న నిత్యానంద కైలాస దేశం

దేశం విడిచి పారిపోయిన నిత్యానంద స్వామి యునైటెడ్ స్టేట్స్ ఆఫ్ కైలాస పేరుతో కొత్త దేశాన్ని ఏర్పాటు చేసిన సంగతి తెలిసిందే. అడపా, దడపా కైలాస దేశం గురించి వార్తలు వచ్చినప్పటికీ... ఐక్యరాజ్యసమితితో ఆ దేశ ప్రతినిధులు కనిపించేసరికి అందరూ ఒక్క సారిగా షాక్ కు గురయ్యారు. అప్పటి నుంచి నిత్యానంద దేశం ప్రధాన వార్తల్లో నిలుస్తూ వస్తోంది. 

ఈ క్రమంలో తాజాగా మరో ఆసక్తికర విషయం వెలుగు చూసింది. 'సాంస్కృతిక భాగస్వామ్యం' పేరుతో అమెరికాలో 30 నగరాలతో కైలాస దేశం ఒప్పందాలను కుదుర్చుకుంది. సిస్టర్ సిటీ పేరుతో ఈ ఒప్పందాలను కుదుర్చుకుంది. అయితే కైలాస దేశం అంటే ఏంటో కూడా తెలుసుకోకుండానే ఆ దేశాలు ఒప్పందం చేసుకోవడం గమనార్హం. చివరకు దీన్ని గ్రహించిన నెవార్క్ సిటీ ఒప్పందం రద్దు చేసుకుంది. సిస్టర్ సిటీగా ఒప్పందం చేసుకోవాలంటే ఆ దేశానికి మానవ హక్కులకు సంబంధించి మంచి ప్రమాణాలు ఉండాలని తెలిపింది. కైలాస దేశంతో సిస్టర్ సిటీ ఒప్పందం చేసుకున్నట్టు పలు నగరాలు ధ్రువీకరించాయి.