కుప్పకూలిన ఆర్మీ హెలికాప్టర్ చీతా

చీతా అనే భారత వైమానిక దళం హెలికాప్టర్ అరుణాచల్ ప్రదేశ్‌లో కూలిపోయింది. ఈ హెలికాప్టర్ గురువారం బొమ్డిల పట్టణానికి పశ్చిమాన మండాల అనే ప్రాంతంలో కూలింది. ఈ ఉదయం 9.15 గంటలకు ఇది ఎయిర్ ట్రాఫిక్ కంట్రోల్‌తో సంబంధాలను కోల్పోయినట్టు అధికారులు గుర్తించారు. ఈ మేరకు గువాహటి రక్షణ రంగ ప్రజా సంబంధాల అధికారి లెఫ్టినెంట్ కల్నల్ మహేంద్ర రావత్ ప్రకటన విడుదల చేశారు. విధి నిర్వహణలో భాగంగా ఈ హెలికాప్టర్ సెంగె నుంచి మిస్సమరి వెళ్తోందని పేర్కొన్నారు. 

దీనిలో పైలట్లుగా  ఓ లెఫ్టినెంట్ కల్నల్, ఓ మేజర్ ఉన్నట్లు సమాచారం. గాలింపు బృందాలను రంగంలోకి దించినట్లు ఈ ప్రకటన వెల్లడించింది. వైమానిక దళంలో చేతక్, చీత రకం హెలికాప్టర్లు 200 వరకు సేవలు అందిస్తున్నాయి. ఎత్తైన ప్రదేశాలలో సాయుధ బలగాలకు ఇవి రక్షణగా ఉన్నాయి. కానీ, పాతబడుతున్న నేపథ్యంలో వీటి స్థానాల్లో కొత్త వాటిని తీసుకోవాల్సిన అవసరం ఉంది.