నా భార్య అలిగింది.. బుజ్జగించేందుకు 10 రోజుల సెలవు కావాలి: ఎస్పీకి ఇన్‌స్పెక్టర్ లీవ్ లెటర్

హోలీ జరుపుకునేందుకు పుట్టింటికి తీసుకెళ్లనందుకు తన భార్య అలిగిందని, ఆమెకు నచ్చజెప్పి బుజ్జగించేందుకు 10 రోజుల సెలవు కావాలని ఎస్పీకి పోలీస్ ఇన్‌స్పెక్టర్ రాసిన లీవ్ లెటర్ ఒకటి సోషల్ మీడియాలో వైరల్ అవుతోంది. ఉత్తరప్రదేశ్‌లోని ఫరూఖాబాద్‌కు చెందిన ఇన్‌స్పెక్టర్ రాసిన సెలవు చీటీలో.. సెలవులు దొరక్క పోవడంతో గత 22 ఏళ్లుగా తన భార్యను పుట్టింటికి తీసుకెళ్లలేకపోయానని ఇన్‌స్పెక్టర్ ఆవేదన వ్యక్తం చేశారు.

ఈసారి తనతో కలిసి పుట్టింటికి వెళ్లాలని కోరుకుంటోందని, కాబట్టి తనకు సెలవులు తప్పనిసరిగా అవసరమని పేర్కొన్నారు. తన సమస్యను పరిగణనలోకి తీసుకుని పది రోజులు సెలవు మంజూరు చేయాలని కోరారు. ఈ లీవ్ లెటర్ చదివిన ఎస్పీ అశోక్ కుమార్ మీనా నవ్వు ఆపుకోలేకపోయారు. ఇన్‌స్పెక్టర్ కోరినట్టు కాకుండా ఐదు రోజుల సెలవులు మంజూరు చేసినట్టు తెలుస్తోంది. 

బీహార్‌లో ఉపాధ్యాయులు
గతంలో బీహార్‌లోనూ ఇలాంటి వింతైన లీవ్ లెటర్స్ సోషల్ మీడియాకెక్కాయి. తన తల్లి చనిపోబోతోందని, అంత్యక్రియల కోసం పలానా రోజుల్లో సెలవులు కావాలని ఒకరు, త్వరలోనే తన ఆరోగ్యం పాడవబోతోందని, కాబట్టి సెలవులు కావాలని మరొకరు, నేనో పెళ్లికి వెళ్లాలని, అక్కడి విందులో ఏది పడితే అది తినేస్తే కడుపు నొప్పి వస్తుంది కాబట్టి సెలవు కావాలని ఇంకొకరు ఇలా.. విద్యాశాఖాధికారులకు ఉపాధ్యాయులు రాసిన సెలవు చీటీలు గతేడాది సామాజిక మాధ్యమాలకెక్కి నవ్వు తెప్పించాయి.