ఫ్యాషన్ పేరిట బిగుతు దుస్తులు ధరిస్తే జరిగేది ఇదే!

ఆధునిక జమానాలో యువత ఫ్యాషనబుల్‌గా కనిపించేందుకు తాపత్రయ పడుతోంది. దుస్తులు బిగుతుగా, ఇబ్బందికరంగా ఉన్నా పట్టించుకోవట్లేదు. తమ శరీరాకృతికి సరిపడనివి వేసుకుంటూ కొందరు ఇబ్బందిని భరిస్తుంటారు. ట్రెండీగా కనిపించాలంటే ఆ మాత్రం తిప్పలు తప్పవని సర్దిచెప్పుకుంటారు. అయితే..ఇలాంటి ఆలోచనా ధోరణి ఏమాత్రం సరికాదని వైద్యులు చెబుతున్నారు. రోజులో అధికభాగం బిగుతైన దుస్తులు ధరిస్తే సమస్యలు తప్పవని హెచ్చరిస్తున్నారు. 

బిగుతైన దుస్తులతో వచ్చే సమస్యలు.. 

• బిగుతైన దుస్తులతో చర్మంలో రక్తప్రసరణకు అడ్డంకులు ఏర్పడొచ్చు. ఫలితంగా కొన్ని సందర్భాల్లో కీలకమైన నాడులు దెబ్బతింటాయి. 
• చర్మంపైనే చమట నిలిచిపోయి స్వేదరంధ్రాల్లో మురికి పేరుకుపోతుంది. ఫలితంగా..  రకరకాల దద్దుర్లు, ఫంగల్ ఇన్ఫెక్షన్ల బారిన పడాల్సి వస్తుంది.
• ఇక పొట్ట చుట్టూ బిగుతుగా ఉంటే ఆహారం అరుగుదలలో సమస్యలు వచ్చే ప్రమాదం కూడా ఉందని నిపుణులు హెచ్చరిస్తున్నారు. 
• సున్నితమైన చర్మం కలవారు బిగుతైన దుస్తులకు దూరంగా ఉంటేనే మంచిది.
• నైలాన్, రెసిన్ వంటి సింథటిక్ వస్త్రాలకు బదులు, కాటన్‌తో తయారైన సహజసిద్ధమైన దుస్తులను ఎంపిక చేసుకుంటే మంచిదని నిపుణులు చెబుతున్నారు.