బిగ్ బాష్ లీగ్ లో చెత్త రికార్డు... 15 పరుగులకే ఆలౌటైన సిడ్నీ థండర్

ఐపీఎల్ తరహాలో ఆస్ట్రేలియాలో జరిగే బిగ్ బాష్ టీ20 లీగ్ లో ఇవాళ అత్యంత చెత్త రికార్డు నమోదైంది. సిడ్నీ థండర్ జట్టు కేవలం 15 పరుగులకే ఆలౌట్ అయింది. పురుషుల సీనియర్ టీ20 క్రికెట్లో ఇదే అత్యల్ప స్కోరు. ఇప్పటిదాకా ఈ చెత్త రికార్డు టర్కీ పేరిట ఉండేది. టర్కీ జట్టు చెక్ రిపబ్లిక్ జట్టుతో మ్యాచ్ లో 21 పరుగులకే ఆలౌటైంది. ఇప్పుడు టర్కీ జట్టుకు ఊరట కలిగిస్తూ సిడ్నీ థండర్ జట్టు ఆ రికార్డును తన పేరిట లిఖించుకుంది. 

నేడు సిడ్నీలో అడిలైట్ స్ట్రయికర్స్, సిడ్నీ థండర్ మధ్య మ్యాచ్ జరిగింది. మొదట బ్యాటింగ్ చేసిన అడిలైడ్ జట్టు 20 ఓవర్లలో 9 వికెట్లకు 139 పరుగులు చేసింది. 140 పరుగుల లక్ష్యంతో బరిలో దిగిన సిడ్నీ జట్టు 5.5 ఓవర్లలో 15 పరుగులకే చేతులెత్తేసింది. 

ఆ జట్టులో ఒక్కరంటే ఒక్కరు కూడా డబుల్ డిజిట్ స్కోరు సాధించలేకపోయారు. ఏకంగా ఐదుగురు డకౌట్ అయ్యారు. కనీసం రెండంకెల సంఖ్యలో బంతులను కూడా ఎదుర్కోలేకపోయారు... ఇక్కడా సింగిల్ డిజిట్టే! 

అడిలైడ్ బౌలర్లలో హెన్రీ థోర్న్ టన్, వెస్ అగర్ వికెట్ల పండగ చేసుకున్నారు. థోర్న్ టన్ 3 పరుగులు ఇచ్చి 5 వికెట్లు తీయగా, అగర్ 6 పరుగులు ఇచ్చి 4 వికెట్లు పడగొట్టాడు. మాథ్యూ షార్ట్ 1 వికెట్ తీశాడు. ఈ మ్యాచ్ లో అడిలైడ్ స్ట్రయికర్స్ జట్టు 124 పరుగుల భారీ తేడాతో ఘనవిజయం సాధించింది.